جہلم: ڈپٹی کمشنر جہلم محمد میثم عباس کی زیر صدارت ضلعی انسداد پولیو کمیٹی کا اجلاس منعقد ہوا۔
اجلاس میں تمام اسسٹنٹ کمشنرز، چیف ایگزیکٹو ڈسٹرکٹ ہیلتھ اتھارٹی ڈاکٹر میاں مظہر حیات، ڈسٹرکٹ ہیلتھ آفیسر، ڈسٹرکٹ سرویلنس آفیسر، عالمی ادارہ صحت کے ڈاکٹر ممتاز احمد، فوکل پرسن ویکسینیشن پروگرام، محکمہ پولیس، موٹر وے پولیس، محکمہ تعلیم اور پاپولیشن کے نمائندوں سمیت تمام متعلقہ اداروں نے شرکت کی۔
اجلاس کے دوران سی ای او ہیلتھ ڈاکٹر میاں مظہر حیات نے 28 اکتوبر سے یکم نومبر تک جاری رہنے والی پولیو مہم کے حوالے سے بریفننگ دیتے ہوئے بتایا کہ ضلع جہلم کی 56 یونین کونسلوں میں 5 سال سے کم عمر کے 228,908 بچوں کو پولیو کے قطرے پلائے جائیں گے اور 6 ماہ سے 5 سال تک کے بچوں کو وٹامن اے کے کیپسول دیے جائیں گے۔ اس مقصد کے لیے 1094 فیلڈ ٹیمز، 74 فکسڈ ٹیمز اور 24 ٹرانزٹ ٹیمز تشکیل دی گئی ہیں۔
انہوں نے بتایا کہ مہم کی نگرانی کے لیے 223 ایریا انچارجز اور 56 یونین کونسل انچارجز کام کریں گے۔ پولیو مہم کے حوالے سے تمام انتظامات مکمل کر لیے گئے ہیں، محکمہ پولیس نے سکیورٹی کے تمام اقدامات کو یقینی بنایا ہے جبکہ موٹر وے پولیس نے بھی اپنی تیاریوں کو حتمی شکل دی ہے۔
ڈپٹی کمشنر میثم عباس نے ہدایت کی کہ پولیو ٹیمز کی سکیورٹی کو یقینی بنایا جائے، پولیو ویکسین سے انکاری والدین کے بچوں کو اسسٹنٹ کمشنرز کی مدد سے اسی دن قطرے پلائے جائیں اور مہم کا سو فیصد ٹارگٹ مکمل کیا جائے۔
