دینہ میں جی ٹی روڈ پر مسافر کوچ اور ٹرک کے مابین تصادم، 5 افراد شدید زخمی

دینہ میں جی ٹی روڈ پر مسافر کوچ اور ٹرک کے درمیان تصادم سے 5 افراد شدید زخمی ہو گئے

تفصیلات کے مطابق جہلم کی تحصیل دینہ کے نواحی علاقے چک مہیوں کے مقام پر جی ٹی روڈ پر ایک تیز رفتار مسافر کوچ اور ٹرک کے درمیان خطرناک تصادم کے نتیجے میں پانچ افراد زخمی ہو گئے، جن میں سے دو کی حالت تشویشناک بتائی جا رہی ہے۔

ریسکیو ذرائع کے مطابق حادثہ اس وقت پیش آیا، جب سیالکوٹ سے مردان جانے والی کوچ تیز رفتاری کے باعث بے قابو ہو کر ٹرک سے جا ٹکرائی۔ تصادم اس قدر شدید تھا کہ مسافر کوچ کا اگلا حصہ بری طرح متاثر ہوا۔

ریسکیو 1122 کے مطابق حادثے کی اطلاع ملتے ہی امدادی ٹیمیں فوری طور پر جائے وقوعہ پر پہنچ گئیں اور زخمیوں کو ابتدائی طبی امداد فراہم کرنے کے بعد ڈسٹرکٹ ہیڈکوارٹر ہسپتال (ڈی ایچ کیو) جہلم منتقل کر دیا گیا۔

زخمی ہونے والوں میں 50 سالہ ولایت خان ولد فتح حسن، 30 سالہ کامران ضمیر ولد روشان ضمیر، 42 سالہ ایاز خان ولد بابر خان، 42 سالہ شوکت علی ولد غنی شیر اور 45 سالہ عطا الرحمن ولد میاں بخش شامل ہیں۔ ریسکیو ذرائع کے مطابق دو زخمیوں کی حالت تشویشناک ہے جنہیں طبی امداد دی جا رہی ہے۔