جہلم: پانچ روزہ پولیو مہم 8 تا 12 جنوری جاری رہے گی، دولاکھ 21 ہزار سے زائد بچوں کو پولیو کے حفاظتی قطرے پلائے جائیں گے۔
تفصیلات کے مطابق ملک بھر کی طرح جہلم سے پولیو جیسی خطرناک بیماری کو ختم کرنے کے لیے محکمہ صحت کے زیر انتظام پانچ روزہ پولیو مہم 8 تا 12 جنوری ہو گی جس میں ضلع بھر میں 2 لاکھ 21 ہزار 85 بچوں کو پولیو کے قطرے پلائے جائیں گے۔
اس حوالے سے محکمہ صحت کے جاری کردہ اعدادوشمار کے مطابق 1094 موبائل ٹیمیں مقرر کر دی گئی ہیں جبکہ 74 فکس اور 24 ٹرانزٹ ٹیموں کی نگرانی کے لیے 223 ایریا انچارج اور 56 یونین کونسل مانیٹرنگ آفیسر بھی مصروف عمل رہیں گے۔
ڈپٹی کمشنر جہلم کیپٹن (ر) سمیع اللہ فاروق نے اس حوالے سے خصوصی ہدایت جاری کرتے ہوئے کہا ہے کہ ضلع جہلم کو مکمل طور پر پولیو فری بنایا جائے گا اور اس مہم میں کوئی ایک بھی بچہ ویکسین سے محروم نہیں رہنا چاہیے، جہلم شہر کو پولیو فری بنانے کے لیے ایک ہو کر کام کرنے کی ضرورت ہے۔
مہم کی نگرانی ڈی سی جہلم کیپٹن (ر) سمیع اللہ فاروق اور محکمہ صحت کے اعلی افسران خود کریں گے۔
