گریٹر مانچسٹر/ بولٹن: برطانیہ کے شہر راچڈیل سے تعلق رکھنے والے پاکستان نژاد دو بچوں کے باپ چوہدری تصرف محمود حسین کو آبائی وطن پاکستان پہنچتے ہی گولی مار کر قتل کر دیا گیا بتایا گیا ہے۔
تصرف محمود حسین جن کا خاندان اور دیگر عزیز اوقارب آزاد کشمیر کے شہر ڈڈیال کے قریبی قصبے بہاری گاؤں میں رہتے ہیں، مقتول انہیں سرپرائز دینے کیلئے بغیر اطلاع دیئے برطانیہ سے پاکستان روانہ ہو ئے تھے،لیکن یہ المناک واقعہ پیش آگیا۔
مقتول اسلام آباد ائرپورٹ سے نکل کر آزاد کشمیر کی جانب جا رہے تھے کہ ائرپورٹ سے کچھ فاصلے پراسلام آباد کی ایک شاہراہ پر پولیس کی وردی میں ملبوس افراد نے انہیں روکا ،بتایا گیا ہے کہ ان کے ساتھ گفتگو کے دوران انہیں گولی مار کر ہلاک کر دیا گیا برطانیہ میں اس دل دہلا دینے والی خبر کے ملتے ہی پاکستانیوں اور کشمیریوں میں تشویش کی لہر دوڑ گئی۔
کمیونٹی نے ایک دوسرے کے ساتھ اس واقعہ پر شدید غم و غصے کا اظہار کیا اور برطانوی حکومت سے مطالبہ کیا کہ وہ اس واقعہ پر حکومت پاکستان سے ملزمان کی فوری گرفتاری کیلئے رابطہ کرے تاکہ مقتول کے خاندان کو انصاف دلایا جا سکے ۔
واقعہ پر راچڈیل سے رکن پارلیمنٹ ٹونی لائیڈ اور راچڈیل کونسل کے رہنما کاؤن نیل ایموٹ واقعہ پر دفتر خارجہ اور برطانیہ میں پاکستان کے ہائی کمشنر ڈاکٹر محمد فیصل کو خط لکھا ہے جس میں اس بات پر زور دیا ہے کہ مقتول تصرف حسین جوکہ برطانوی شہری ہے،کے قاتلوں کی فوری گرفتاری کیلئے وسیع پیمانے پر تحقیقات کرائی جائے اور انصاف کے تقاضوں کو پورا کرنے کیلئے ملزمان کو کیفرکردار تک پہنچانے کو یقینی بنایا جائے۔
انہوں نے واقعہ پر افسوس کا اظہار کرتے ہوئے کہا کہ ہماری تمام تر ہمدردیاں غمزدہ خاندان کے ساتھ ہیں، انہوں نے راچڈیل میں آباد پاکستانی اور کشمیری کمیونٹی کو یقین دلایا کہ ملزمان کی گرفتاری تک چین سے نہیں بیٹھیں گے اور اس سلسلے میں ایک پٹیشن بھی تیار کی گئی ہے جس میں حکومت برطانیہ پر زور دیا گیا ہے کہ وہ برطانوی شہری کے بے گناہ قتل پر حکومت پاکستان سے فوری رابطہ کرے تاکہ ملزمان کو انصاف کے کٹہرے میں لایا جا سکے اور بیرون ملک سے آبائی وطن جانے والوں کے تحفظ کو یقینی بنایا جا سکے۔
واقعہ پر گریٹر مانچسٹر کے مختلف سیاسی، سماجی رہنما کونسلر چوہدری محمد عدالت، قاری سمندر خان، کونسلر شاہ وزیر حسین، بیرسٹر امجد ملک، کونسلر عاصم رشید، چوہدری شہبازسرور ،چوہدری انور یعقوب، حاجی گلزار خان، سابق کونسلرراجہ محمد ادریس، تھنکر فورم کے چیئرمین ڈاکٹر محمد سرور اشرف نے تصرف محمود حسین کے قتل کی شدید الفاظ میں مذمت کی اور کہا کہ نوجوان نسل جو چھٹیاں گزارنے پاکستان جاتی تھی، اب پاکستان کی بجائے یورپین ملکوں کو ترجیح دیتی ہے۔
کمیونٹی شخصیات نے کہاکہ جو پیٹشن تیار کی گئی ہے اس پر برطانیہ میں آباد تمام پاکستانیوں اور کشمیریوں کو چاہئے کہ فوری طور پر دستخط کریں تاکہ مستقبل قریب میں اس قسم کے سانحات دوبارہ رونما نہ ہو سکیں۔
