جہلم: نیشنل ڈیزاسٹر مینجمنٹ اتھارٹی (این ڈی ایم اے) نے ملک بھر میں مون سون بارشوں اور ممکنہ سیلابی صورتحال کے پیش نظر الرٹ جاری کر دیا ہے۔
محکمہ موسمیات کے مطابق 30 اگست تک جہلم، چکوال، راولپنڈی، مری، گلیات، اٹک سمیت پنجاب کے دیگر اضلاع میں تیز اور طوفانی بارشوں کا سلسلہ جاری رہے گا۔
پنجاب، خیبر پختونخوا، گلگت بلتستان اور آزاد کشمیر میں بھی شدید بارشوں کی پیشگوئی کی گئی ہے، جبکہ نشیبی علاقوں میں سیلاب اور پہاڑی علاقوں میں لینڈ سلائیڈنگ کے خطرات موجود ہیں۔ لاہور، راولپنڈی، ملتان اور فیصل آباد میں فلیش فلڈنگ کا خدشہ ظاہر کیا گیا ہے، جبکہ پہاڑی ندی نالوں اور آبی گزرگاہوں میں طغیانی متوقع ہے۔
نالہ گھان اور نالہ بہناں سے نکلنے والے بارشی پانی کے باعث متعدد دیہات متاثر ہوئے ہیں، مکین شدید مشکلات کا شکار ہیں، جبکہ کھیتوں میں کھڑا سیلابی پانی چاول اور دھان سمیت مختلف فصلوں کو نقصان پہنچا رہا ہے، جس سے کسانوں کو کروڑوں روپے کے مالی نقصان کا سامنا ہے۔
پی ڈی ایم اے کے مطابق پنجاب میں مون سون بارشوں کا آٹھواں اسپیل 30 اگست تک جاری رہے گا۔ اس سلسلے میں تمام ڈپٹی کمشنرز اور متعلقہ محکموں کو ہائی الرٹ رہنے کی ہدایت جاری کر دی گئی ہے۔
