جہلم: ڈپٹی کمشنر جہلم میر رضا اوزگن نے واسا ٹیم کے ہمراہ شہر کے مختلف علاقوں کا تفصیلی دورہ کیا اور نکاسی آب کے جاری منصوبوں کا معائنہ کیا۔ اس موقع پر انہوں نے نارتھ زون کے علاقے سلمان پارس میں موجود نالے کی توسیع کے کام کا جائزہ لیا۔
ڈپٹی کمشنر نے کام کی رفتار اور معیار کو چیک کرتے ہوئے ہدایت کی کہ نالے کی چوڑائی میں اضافے سے علاقے میں نکاسی آب کا دیرینہ مسئلہ مستقل بنیادوں پر حل ہونا چاہیے تاکہ شہریوں کو درپیش مشکلات کا خاتمہ ہو سکے۔
بعد ازاں ڈپٹی کمشنر جہلم میر رضا اوزگن نے ساؤتھ زون کے علاقے سعیلہ کا دورہ کیا جہاں نئے نالے کی تعمیر کا کام رکا ہوا تھا۔ انہوں نے موقع پر کام کی بندش کی وجوہات کا جائزہ لیا اور واسا ٹیم کو فوری طور پر تعمیراتی کام دوبارہ شروع کرنے کے سخت احکامات جاری کیے۔
ڈپٹی کمشنر نے واضح کیا کہ عوامی مفاد کے ان اہم منصوبوں میں کسی قسم کی تاخیر برداشت نہیں کی جائے گی اور تمام تعمیراتی کام مقررہ ٹائم لائن کے اندر مکمل کیے جائیں۔
انہوں نے واسا افسران کو ہدایت کی کہ وہ فیلڈ میں رہ کر نالوں کی توسیع اور تعمیراتی کاموں کی نگرانی کریں تاکہ شہریوں کو درپیش سیوریج کے مسائل کا مؤثر حل نکالا جا سکے۔ ڈپٹی کمشنر نے کہا کہ وزیر اعلیٰ پنجاب مریم نواز شریف کے وژن کے تحت شہر کے انفراسٹرکچر کو جدید خطوط پر استوار کیا جا رہا ہے۔
شہریوں نے سلمان پارس میں نالے کی توسیع اور سعیلہ میں رکے ہوئے تعمیراتی کام کو دوبارہ شروع کروانے پر ڈپٹی کمشنر کے اس اقدام کا خیر مقدم کیا ہے۔
