دینہ میں ٹریفک کے دو مختلف حادثات میں خواتین سمیت 8 افراد شدید زخمی ہو گئے، ریسکیو 1122نے موقع پر پہنچ کر زخمیوں کو طبی امداد دی ۔
تفصیلات کے مطابق دینہ کے قریب ہائی وے دفتر جی ٹی روڈ دینہ کے مقام پر تیز رفتار 2موٹرسائیکل سواروں میں خوفناک حادثہ پیش آیا ، جس سے دونوں موٹرسائیکلوں پر سوار 3افراد شدید زخمی ہو گئے۔
زخمی ہونے والوں میں شکیل ولد ریاض عمر 45سال سکنہ میانہ محلہ دینہ ، عمر گل ولد تسلیم اسلم عمر 20سال سکنہ کھولیا ڈومیلی اور آریان ولد رفاقت عمر 18سال سکنہ کھولیا ڈومیلی تحصیل سوہاوہ شامل ہیں۔
دوسرا خوفناک حادثہ الطاف بائی پاس روڈ پر زوم پٹرول پمپ کے قریب پیش آیا جہاں یوٹرن لیتے ہوئے ایک موٹرسائیکل دوسرے موٹرسائیکل سے ٹکرا گیا جس کے نتیجے میں خواتین سمیت 5 افراد شدید زخمی ہو گئے۔
زخمیوں ہونے والوں میں 23 سالہ عثمان ولد خالد، 45 سالہ نسرین زوجہ معروف، 12 سالہ جہانزیب ولد معروف، 50 سالہ نسیم زوجہ اختر اور 28 سالہ ذیشان ولد محمد ریاض شامل ہیں۔ پانچوں زخمیوں کا تعلق دینہ کے علاقہ نکودر سے ہے۔
حادثے کی اطلاع ملتے ہی ریسکیو 1122کی ٹیمیں جائے حادثہ پر پہنچ گئیں اور زخمیوں کو فوری طور پر طبی امداد دینے کے بعد ڈسٹرکٹ ہیڈ کوارٹر ہسپتال جہلم منتقل کر دیا۔
