جہلم شہر سمیت ضلع بھر میں پٹرولیم مصنوعات کی قیمتوں میں کمی کے باوجود اشیائے خورونوش کی قیمتوں میں کمی کا نہ ہونا انتظامیہ کی نا اہلی کا منہ بولتا ثبوت ہے ، دکانداروں نے دکانوں پر ریٹ لسٹیں آویزاںتو کررکھی ہیں لیکن اشیاء خوردنوش کے من مرضی کے نرخ وصول کئے جارہے ہیں جبکہ پرائس کنٹرول مجسٹریٹس دکانداروں کے خلاف کارروائیاں کرنے سے گریزاں ہیں۔
تفصیلات کے مطابق حکومت کی جانب سے پٹرولیم مصنوعات کی قیمتوں میں واضح کمی کے باوجود کرایوں اور اشیائے خورونوش کی قیمتوں میں کمی نہ ہوسکی۔
شہریوں کا کہنا ہے کہ ٹرانسپورٹرز اور دکانداروں نے پٹرولیم مصنوعات کی قیمتوں میں اضافے کے ساتھ ہی کرایوں اور اشیائے خورونوش و دیگر اشیائے ضروریہ کی قیمتوں میں اضافہ کر دیا تھا لیکن اب مسلسل پٹرولیم مصنوعات کی قیمتوں میں کمی کی جارہی ہے لیکن اس کے باوجودٹرا نسپورٹروں نے کرایوں میں کمی نہیں کی اور مسافروں سے اوور چار جنگ کی جارہی ہے۔ دوسری طرف دکاندار اشیائے ضروریہ کی قیمتوں میں کمی کرنے کو تیار نہیں جس کے باعث شہری پریشان دکھائی دیتے ہیں۔
شہریوں نے کہا کہ دکانداروں نے ریٹ لسٹیں آویزاں کررکھی ہیں لیکن وصولی من مرضی کی کررہے ہیں۔ جبکہ پرائس کنٹرول مجسٹر یٹس دکانداروں کے خلاف کارروائیاں کرنے سے گریزاں ہیں۔ شہریوں نے نگران وزیراعلیٰ پنجاب، چیف سیکرٹری پنجاب، کمشنر راولپنڈی ، ڈپٹی کمشنر سے نوٹس لینے کا مطالبہ کیاہے ۔
