جہلم: جامعہ علوم اثریہ جہلم کا 43واں سالانہ جلسہ تقسیم اسناد و انعامات و تقریب بخاری رئیس الجامعہ حافظ عبدالحمید عامر کی زیرِ صدارت 11 اکتوبر بروز اتوار منعقد ہوگا۔ سالانہ جلسے اور تقریب بخاری کے انتظامات کو مثالی اور حتمی طور پر منظم کرنے کے لیے جامعہ علوم اثریہ کے احاطے میں ایک اہم اجلاس منعقد ہوا، جس کی صدارت رئیس الجامعہ حافظ عبدالحمید عامر نے کی۔
اجلاس میں سالانہ جلسے کے کامیاب، باوقار اور منظم انعقاد کے لیے مختلف انتظامی کمیٹیاں تشکیل دی گئیں، جبکہ تمام اہم ذمہ داریاں جامعہ کے تجربہ کار اساتذہ کرام اور متحرک طلبہ کے سپرد کر دی گئیں۔ تفصیلی مشاورت کے بعد مختلف ڈیوٹیوں اور ان کے نگرانوں کے ناموں کو بھی حتمی شکل دے دی گئی، تاکہ سالانہ جلسے کے موقع پر انتظامی امور احسن انداز میں انجام دیے جا سکیں۔
اجلاس سے خطاب کرتے ہوئے رئیس الجامعہ حافظ عبدالحمید عامر نے کہا کہ جامعہ علوم اثریہ کا سالانہ جلسہ اور تقریب بخاری ایک مقدس، عظیم الشان اور اہم علمی و تبلیغی سرگرمی ہے، جس میں ملک بھر سے علمائے کرام، مہمانانِ گرامی اور شرکائے جلسہ شرکت کرتے ہیں۔ انہوں نے کہا کہ گزشتہ سالوں کی کارکردگی اور رپورٹس کو مدنظر رکھتے ہوئے اس سال یہ پختہ عہد کرنا ہوگا کہ تمام انتظامات کو پہلے سے بھی زیادہ بہتر، منظم اور مثالی بنایا جائے۔
انہوں نے تمام ذمہ داران اور کارکنان پر زور دیا کہ وہ انہیں سونپی گئی ذمہ داریاں انتہائی تندہی، اخلاص اور ذمہ داری کے ساتھ نبھائیں اور جلسے کے انتظامات میں کسی قسم کی کمی نہ رہنے دیں۔ ان کا کہنا تھا کہ ایک بڑے علمی و دینی اجتماع کی کامیابی کے لیے تمام شعبوں کے درمیان باہمی تعاون، نظم و ضبط اور بہترین رابطہ ضروری ہے۔
اجلاس میں اس بات پر بھی خصوصی تاکید کی گئی کہ ملک بھر سے آنے والے مہمانوں، علمائے کرام اور شرکائے جلسہ کو بہترین طعام اور قیام کی سہولیات فراہم کی جائیں، تاکہ وہ جامعہ علوم اثریہ سے ایک خوشگوار اور مثبت پیغام لے کر واپس جائیں۔ شرکائے اجلاس نے مختلف انتظامی امور کے حوالے سے اپنی تجاویز بھی پیش کیں اور انہیں مؤثر انداز میں مکمل کرنے کے عزم کا اظہار کیا۔
اجلاس کے اختتام پر جامعہ علوم اثریہ جہلم کے سالانہ جلسہ تقسیم اسناد و انعامات و تقریب بخاری کی کامیابی، انتظامات میں آسانی اور خیر و برکت کے لیے خصوصی دعا کی گئی۔
