پنڈدادنخان: ڈسٹرکٹ پولیس آفیسر جہلم طارق عزیز سندھو کی ہدایت پر منشیات اور شراب فروشوں کے خلاف بھرپور کریک ڈاؤن جاری ہے۔ حالیہ کارروائیوں میں پنڈدادنخان اور جلالپور شریف پولیس نے اہم کارروائیاں کیں۔
تھانہ پنڈدادنخان پولیس نے کارروائی کرتے ہوئے شراب سپلائی میں ملوث ملزم افتخار احمد کو گرفتار کر لیا، جس کے قبضے سے 10 لیٹر شراب برآمد کر لی گئی۔ ملزم کے خلاف قانونی کارروائی کرتے ہوئے مقدمہ درج کر لیا گیا ہے۔
دوسری جانب تھانہ جلالپور شریف پولیس نے بھی ایک اور کامیاب کارروائی کرتے ہوئے منشیات فروش ملزم حسیب کو گرفتار کر لیا۔ پولیس کے مطابق گرفتار ملزم کے قبضے سے ایک کلو 100 گرام ہیروئن برآمد کی گئی، جس پر انسداد منشیات ایکٹ کے تحت مقدمہ درج کیا گیا ہے۔
ڈسٹرکٹ پولیس آفیسر جہلم طارق عزیز سندھو نے کہا ہے کہ منشیات فروش معاشرے کا ناسور ہیں، جن کے خلاف جہلم پولیس کی بھرپور کارروائیاں جاری رہیں گی۔ انہوں نے عوام سے اپیل کی کہ وہ جرائم پیشہ عناصر کی نشاندہی کر کے پولیس سے تعاون کریں تاکہ ایک پرامن اور صحت مند معاشرے کی تشکیل ممکن ہو سکے۔
