جہلم: ڈسٹرکٹ پولیس آفیسر جہلم طارق عزیز سندھو نے کہا ہے کہ نوجوانوں کی اموات کی سب سے بڑی وجہ سڑک حادثات ہیں، جن میں سب سے زیادہ حادثات موٹر سائیکل سواروں کے ہوتے ہیں۔ ان حادثات میں سر کی چوٹ بنیادی وجہ بنتی ہے۔
یہ بات انہوں نے روڈ سیفٹی آگاہی مہم سے خطاب کرتے ہوئے کہی۔ تقریب میں شہریوں میں مفت ہیلمٹ اور بیک ویو مررز تقسیم کیے گئے۔ انہوں نے کہا کہ 80 فیصد سے زیادہ حادثات موٹر سائیکل سواروں کے ہیں، جبکہ ہیلمٹ نہ صرف سر کی چوٹ سے بچاتا ہے بلکہ ای چالان سے بھی محفوظ رکھتا ہے۔
ڈی پی او جہلم طارق عزیز سندھو نے کہا کہ دو ہزار روپے کا اچھا ہیلمٹ زندگی اور پیاروں کی حفاظت کے ساتھ ساتھ ہزاروں روپے کے چالان سے بہتر ہے۔ ہماری اولین کوشش شہریوں کے جان و مال کا تحفظ اور قانون کی عملداری کو یقینی بنانا ہے۔
ڈی ایس پی ٹریفک خرم فیاض نے اس موقع پر کہا کہ ہیلمٹ پولیس کے لیے نہیں بلکہ شہریوں کی جان بچانے کے لیے ضروری ہے، جس کے لیے ٹریفک پولیس ہمہ وقت کوشاں ہے۔
صدر حمزہ بیگ ویلفیئر سوسائٹی توصیف بیگ نے کہا کہ سوسائٹی کا بنیادی مقصد روڈ سیفٹی ہے، جیسا کہ قرآن میں فرمایا گیا ہے: "جس نے ایک انسان کی جان بچائی گویا اس نے پوری انسانیت کی جان بچائی۔” انہوں نے مزید کہا کہ "ہیلمٹ خریدا جا سکتا ہے، سر نہیں۔ بائیں رہیں، محفوظ رہیں، اور ہمیشہ اچھی کوالٹی کا ہیلمٹ مضبوطی سے باندھیں۔”
تقریب کے بعد روڈ سیفٹی آگاہی واک بھی منعقد کی گئی، جس میں ہیومن رائٹس رہنما عبدالغفور چوہان، میڈیا نمائندگان، پولیس افسران، شہری اور سوسائٹی کے رضاکاران نے شرکت کی۔
ڈی پی او جہلم اور ڈی ایس پی ٹریفک نے شرکاء میں پمفلٹ اور ہیلمٹ تقسیم کیے اور شہریوں کو ٹریفک قوانین کی پاسداری کی تلقین کی۔ انہوں نے کہا کہ تیز رفتاری اور اوور ٹیکنگ حادثات کی بڑی وجوہات ہیں، موٹر سائیکل حادثات میں زیادہ تر سر پر چوٹ لگتی ہے جس سے اموات واقع ہو جاتی ہیں۔
انہوں نے کہا کہ ٹریفک قوانین پر عمل کر کے ہم نہ صرف اپنی بلکہ دوسروں کی جان بھی بچا سکتے ہیں۔ ہمارا خواب: روڈ سیفٹی میں محفوظ جہلم، محفوظ پنجاب، محفوظ پاکستان۔
