جہلم: ضلع جہلم میں منرل واٹر کے نام پر مبینہ طور پر غیر معیاری اور غیر تصدیق شدہ پانی فروخت کیے جانے کی شکایات سامنے آ رہی ہیں، جس پر شہریوں نے پنجاب فوڈ اتھارٹی اور دیگر متعلقہ اداروں سے فوری نوٹس لینے اور مؤثر کارروائی کا مطالبہ کیا ہے۔
شہریوں کے مطابق شہر سمیت ضلع بھر کے بعض ہوٹلوں، میرج ہالز، مارکیز، مارکیٹس، سرکاری و نجی کینٹینز، بس اسٹینڈز اور ریلوے اسٹیشن پر منرل واٹر کے نام سے بوتل بند پانی فروخت کیا جا رہا ہے، تاہم ان کا دعویٰ ہے کہ بعض برانڈز کا پانی مطلوبہ معیار پر پورا نہیں اترتا، جبکہ اس کی قیمتیں بھی زیادہ وصول کی جاتی ہیں۔
مقامی ذرائع کے مطابق شہر کے مختلف رہائشی علاقوں میں بعض افراد نے گھروں میں واٹر فلٹریشن پلانٹس نصب کر رکھے ہیں اور مبینہ طور پر مختلف لیبل لگا کر بوتل بند پانی فروخت کر رہے ہیں۔ شکایت کنندگان کا کہنا ہے کہ ان میں سے بعض واٹر پلانٹس متعلقہ اداروں سے رجسٹرڈ نہیں اور نہ ہی ان کے پانی کے معیار کی باقاعدہ جانچ کرائی جاتی ہے۔
شہریوں نے خدشہ ظاہر کیا کہ اگر غیر معیاری پانی کی فروخت کی شکایات درست ہیں تو اس سے صارفین کی صحت متاثر ہو سکتی ہے اور پانی سے پھیلنے والی بیماریوں کے خطرات بڑھ سکتے ہیں۔
شہریوں نے پنجاب فوڈ اتھارٹی، ضلعی انتظامیہ اور دیگر متعلقہ اداروں سے مطالبہ کیا ہے کہ ضلع بھر میں فروخت ہونے والے بوتل بند پانی، واٹر فلٹریشن پلانٹس اور منرل واٹر برانڈز کی جامع جانچ کی جائے، غیر رجسٹرڈ یا غیر معیاری یونٹس کے خلاف قانونی کارروائی عمل میں لائی جائے اور عوام کو معیاری اور محفوظ پینے کا پانی فراہم کرنے کے لیے مؤثر اقدامات کیے جائیں۔
