جہلم: معروف ٹک ٹاکر ارباز بٹ کی موبائل شاپ سے ایک کروڑ روپے سے زائد مالیت کے موبائل فونز چوری، پولیس نے مقدمہ درج کر لیا۔
تفصیلات کے مطابق جہلم میں ریلوے روڈ پر قائم معروف ٹک ٹاکر اربا بٹ کی موبائل شاپ (شاندار موبائلز) میں مبینہ طور پر چوری کی بڑی واردات سامنے آ گئی ہے، جہاں نامعلوم چور مبینہ طور پر ایک کروڑ روپے سے زائد مالیت کے موبائل فونز چوری کر کے فرار ہو گئے۔ واقعے کا مقدمہ تھانہ سٹی میں درج کر لیا گیا ہے جبکہ واردات کی سی سی ٹی وی فوٹیج بھی منظر عام پر آ چکی ہے۔
ایف آئی آر کے مطابق چوری کی یہ واردات جمعرات اور جمعہ کی درمیانی شب پیش آئی۔ نامعلوم ملزم یا ملزمان دکان کے اندر داخل ہوئے اور انتہائی تسلی کے ساتھ مختلف اقسام کے قیمتی موبائل فونز ایک تھیلے میں جمع کرتے رہے، جس کے بعد وہ موقع سے فرار ہو گئے۔ سی سی ٹی وی فوٹیج میں واضح طور پر دیکھا جا سکتا ہے کہ ملزم بغیر کسی خوف کے فونز سمیٹ رہا ہے۔
ایف آئی آر میں مزید بتایا گیا ہے کہ دکان سے تقریباً 40 فیصد اسٹاک چوری ہوا، جن میں مختلف ماڈلز کے آئی فونز اور دیگر قیمتی موبائل فونز شامل ہیں۔ مدعی مقدمہ ارباز بٹ کے مطابق دکان کو بھاری مالی نقصان کا سامنا کرنا پڑا ہے جبکہ چوری شدہ موبائل فونز کی مجموعی مالیت ایک کروڑ روپے سے تجاوز کر چکی ہے۔
اربا بٹ نے الزام عائد کیا ہے کہ واقعے کے باوجود پولیس کی جانب سے تاحال سست روی کا مظاہرہ کیا جا رہا ہے جبکہ ملزمان کی گرفتاری اور چوری شدہ سامان کی برآمدگی کے لیے مؤثر پیش رفت سامنے نہیں آ سکی۔ ان کا کہنا ہے کہ سی سی ٹی وی فوٹیج پولیس کے حوالے کر دی گئی ہے، جس کی مدد سے ملزمان تک پہنچنا ممکن ہے۔
متاثرہ تاجر اور شہری حلقوں نے مطالبہ کیا ہے کہ پولیس فوری طور پر ملزمان کو گرفتار کرے، چوری شدہ موبائل فونز برآمد کر کے ملزمان کو قانون کے کٹہرے میں لایا جائے تاکہ شہر میں بڑھتی ہوئی چوری کی وارداتوں کا سدباب ممکن ہو سکے۔
