جہلم: ڈسٹرکٹ پولیس آفیسر (ڈی پی او) شفیق احمد چوہدری کی ہدایت پر ضلع بھر میں جرائم پیشہ عناصر کے خلاف سرچ آپریشنز کا سلسلہ جاری ہے۔ اس سلسلے میں ضلع کے مختلف علاقوں میں پولیس نے سرچ آپریشن کرتے ہوئے متعدد افراد، گھروں اور عوامی مقامات کی چیکنگ کی، جبکہ ایک کارروائی کے دوران ناجائز اسلحہ بھی برآمد کر لیا گیا۔
ترجمان جہلم پولیس کے مطابق ضلع بھر میں 14 مختلف مقامات پر سرچ آپریشنز کیے گئے، جن کے دوران 403 افراد، 170 گھروں اور 16 ہوٹلوں و بس اسٹینڈز کی تلاشی اور جانچ پڑتال کی گئی۔
سرچ آپریشن کے دوران تھانہ سٹی کے علاقے میں کارروائی کرتے ہوئے ناجائز اسلحہ رکھنے والے ایک ملزم کو گرفتار کر لیا گیا، جس کے قبضے سے 9 ایم ایم پستول بمعہ ایمونیشن برآمد کر کے قانونی کارروائی شروع کر دی گئی۔
ترجمان کے مطابق جہلم پولیس عوام کے جان و مال کے تحفظ، جرائم کی روک تھام اور ضلع میں امن و امان کے قیام کے لیے مؤثر اقدامات جاری رکھے ہوئے ہے، جبکہ سرچ آپریشنز کا مقصد جرائم پیشہ عناصر، مشتبہ افراد اور غیر قانونی سرگرمیوں کی روک تھام کو یقینی بنانا ہے۔
ڈی پی او شفیق احمد چوہدری نے شہریوں سے اپیل کی ہے کہ وہ اپنے اردگرد کے ماحول پر کڑی نظر رکھیں اور کسی بھی مشکوک شخص، غیر قانونی طور پر مقیم افراد یا جرائم پیشہ سرگرمیوں میں ملوث عناصر کے بارے میں فوری طور پر قریبی تھانے یا پولیس ہیلپ لائن 15 پر اطلاع دیں۔
انہوں نے کہا کہ بروقت اطلاع نہ صرف کسی بڑے جرم کی روک تھام میں مددگار ثابت ہو سکتی ہے بلکہ معاشرے میں پائیدار امن و امان کے قیام میں بھی اہم کردار ادا کرتی ہے۔ انہوں نے اس عزم کا اعادہ کیا کہ شہریوں کے جان و مال کا تحفظ جہلم پولیس کی اولین ترجیح ہے اور قانون شکن عناصر کے خلاف بلاامتیاز کارروائیاں آئندہ بھی جاری رہیں گی۔
