پنڈدادنخان : دھریالہ جالپ کے محلہ پراچگان میں چوری کی ایک بڑی واردات سامنے آئی ہے، جہاں نامعلوم چور مدیع بٹ ولد نور محمد بٹ کے گھر دیوار پھلانگ کر داخل ہوئے، تالے توڑے اور لاکھوں روپے مالیت کا قیمتی سامان چرا کر فرار ہو گئے۔
ذرائع کے مطابق واردات کے وقت گھر کی مالکن ملکوال میں موجود تھیں جبکہ مدیع بٹ بیرون ملک مقیم ہیں۔ چور گھر سے سونے کے زیورات، نقدی اور دیگر قیمتی گھریلو اشیاء چرا کر لے گئے۔ واقعے کے بعد علاقے میں خوف و ہراس کی فضا قائم ہو گئی ہے۔
اطلاع ملنے پر پولیس چوکی دھریالہ جالپ کے اہلکار فوری طور پر موقع پر پہنچے اور حالات کا جائزہ لیا، جبکہ راولپنڈی سے آئی ایک خصوصی ٹیم نے جائے واردات سے فنگر پرنٹس اور دیگر شواہد اکٹھے کیے ہیں۔
پولیس حکام کا کہنا ہے کہ ابتدائی شواہد کی روشنی میں چوروں کا سراغ لگا لیا گیا ہے اور بہت جلد انہیں گرفتار کر کے قانون کے کٹہرے میں لایا جائے گا۔
