جہلم شہر میں تجاوزات کی بھرمار، تجاوزات کی وجہ سے شہر میں ٹریفک جام رہنا معمول بن گیا، پیدل چلنے والوں کوبھی مشکلات کا سامنا، تجاوزات کی بدولت شہریوں کی زندگیاں مفلوج ہو کر رہ گئیں جبکہ بے ہنگم ٹر یفک نے رہی سہی کسر بھی نکال دی۔
تفصیلات کے مطابق جہلم شہر کے بازاروں سڑکوں کے اردگرد ریڑھی بانوں نے ریڑھیاں و لوڈر رکشے کھڑے کرکے آمدورفت میں مشکلات پیدا کر رکھی ہیں۔ شہر میں جگہ جگہ تجاوزات نے شہرکی کشادہ سڑکوں کو باریک گلیوں میں تبدیل کر دیا، ٹریفک پولیس اورمیونسپل کمیٹی کی عدم توجہی کی وجہ سے تجاوزات مافیا نے مستقل بنیادوں پر ٹھیئے قائم کررکھے ہیں۔
انتہائی باوثوق ذرائع سے معلوم ہوا ہے کہ میونسپل کمیٹی کے شعبہ انکروچمنٹ کے عملے اور ٹریفک پولیس کی سرپرستی اور مقامی سیاست دانوں کی آشیر باد کیوجہ سے مافیا نے مستقل بنیادوں پر قبضے جما رکھے ہیں ، بااثر دکانداروں نے تجاوزات کی سرپرستی کرتے ہوئے عارضی ٹھیئے دکانوں کے باہر قائم کروا ر کھے ہیں جن سے باقاعدہ روزانہ کی بنیاد پر مبینہ طور پر بھاری معاوضہ وصول کیا جاتا ہے ۔
شہری، سماجی، رفاعی اور فلاحی تنظیموں کے عمائدین نے نگران وزیراعلیٰ پنجاب، چیف سیکرٹری پنجاب، آئی جی پنجاب اور سیکرٹری بلدیات سے شہر سمیت ضلع بھر میں قائم تجاوزات ختم کروانے کا مطالبہ کیا ہے۔
