جہلم چیمبر آف کامرس اینڈ انڈسٹری (JCCI) کے چیئرمین سرفراز ملک نے چوہدری تبریز اوراہ کو پاکستان پریس کلب لندن کا صدر منتخب ہونے پر دلی مبارکباد پیش کرتے ہوئے اس کامیابی کو ان کی صحافتی خدمات، قائدانہ صلاحیتوں اور برادری کے اعتماد کا مظہر قرار دیا ہے۔
اپنے تہنیتی پیغام میں سرفراز ملک نے کہا کہ چوہدری تبریز اوراہ کا پاکستان پریس کلب لندن کے صدر منتخب ہونا نہ صرف ان کے لیے بلکہ پاکستانی صحافتی برادری کے لیے بھی ایک اعزاز ہے۔ انہوں نے کہا کہ یہ کامیابی ان کی پیشہ ورانہ صلاحیتوں، انتھک محنت اور صحافی برادری کے بھرپور اعتماد کا واضح ثبوت ہے۔
انہوں نے امید ظاہر کی کہ چوہدری تبریز اوراہ اپنی قیادت میں پاکستان پریس کلب لندن کو مزید فعال اور موثر ادارہ بنانے میں اہم کردار ادا کریں گے، جبکہ برطانیہ اور پاکستان کے درمیان صحافتی، سماجی اور پیشہ ورانہ روابط کو مزید مستحکم کرنے میں بھی اپنی صلاحیتیں بروئے کار لائیں گے۔
سرفراز ملک نے چوہدری تبریز اوراہ کے لیے نیک خواہشات کا اظہار کرتے ہوئے کہا کہ وہ اپنی نئی ذمہ داریوں میں مزید کامیابیاں حاصل کریں گے اور برطانیہ میں مقیم پاکستانی کمیونٹی اور صحافتی حلقوں کی مؤثر انداز میں نمائندگی کرتے رہیں گے۔
