جہلم: ووکیشنل ٹریننگ انسٹیٹیوٹ جہلم کے زیر اہتمام جم خانہ جہلم میں ایک شاندار اور پروقار تقریب کا انعقاد کیا گیا، جس میں سرپرست اعلیٰ دینہ پریس کلب امجد محمود سیٹھی کو بطور ایگزیکٹو ممبر بہترین خدمات پر تعریفی شیلڈ سے نوازا گیا۔
تقریب کے دوران چیئرمین راجہ محمد انور اور پرنسپل ووکیشنل ٹریننگ انسٹیٹیوٹ سید عامر علی نے امجد محمود سیٹھی کو شیلڈ پیش کی اور ان کی خدمات کو خراجِ تحسین پیش کیا۔
بعد ازاں دینہ پریس کلب کی جنرل میٹنگ میں بھی امجد محمود سیٹھی کو اس اعزاز پر مبارکباد پیش کی گئی اور اسے دینہ پریس کلب کے لیے باعثِ فخر قرار دیا گیا۔
اجلاس کے دوران دینہ پریس کلب کے سینئر نائب صدر عرفان محبوب کو روزنامہ وقت انٹرنیشنل اسلام آباد کا انچارج نمائندگان مقرر ہونے پر بھی مبارکباد دی گئی۔
شرکاء نے امید ظاہر کی کہ عرفان محبوب صحافتی میدان میں مزید کامیابیاں حاصل کرتے ہوئے ادارے اور علاقے کا نام روشن کریں گے۔
میٹنگ میں اس بات پر بھی اتفاق کیا گیا کہ عوامی مسائل کے فوری حل کیلئے ضلعی انتظامیہ اور متعلقہ اداروں سے ملاقاتیں کی جائیں گی تاکہ شہریوں کو درپیش مشکلات کو مؤثر انداز میں اجاگر اور حل کیا جا سکے۔
