سوہاوہ: تھانہ ڈومیلی پولیس نے کارروائی کرتے ہوئے لڑائی جھگڑا کرنے اور شہریوں کو سنگین نتائج کی دھمکیاں دینے والے دو ملزمان کو گرفتار کرکے ان کے خلاف مقدمہ درج کر لیا ہے۔
ترجمان جہلم پولیس کے مطابق جہلم کی تحصیل سوہاوہ میں تھانہ ڈومیلی پولیس کو اطلاع موصول ہوئی کہ دو ملزمان شہریوں کے ساتھ لڑائی جھگڑا کر رہے ہیں اور انہیں سنگین نتائج کی دھمکیاں دے کر علاقے میں خوف و ہراس پھیلا رہے ہیں۔ اطلاع ملتے ہی پولیس نے فوری کارروائی کرتے ہوئے دونوں ملزمان محمد حفیظ ولد محمد عظیم اور فضل حسین ولد علی بہادر سکنہ کوہالی کو گرفتار کر لیا۔
پولیس نے ملزمان کے خلاف مقدمہ درج کرکے مزید تفتیش شروع کر دی ہے۔
اس حوالے سے ڈی پی او جہلم شفیق احمد چوہدری نے کہا کہ قانون کی بالادستی اور شہریوں کے جان و مال کا تحفظ پولیس کی اولین ترجیح ہے۔ قانون کو ہاتھ میں لینے اور شہریوں کے امن و سکون میں خلل ڈالنے والوں کے خلاف بلاامتیاز کارروائیاں جاری رہیں گی۔


