جہلم: اسلام قریشی ویلفیئر ٹرسٹ، معروف سماجی رہنما ڈاکٹر شہزانہ امتیاز، بابو راجہ اسلم اور اہلِ علاقہ کالا گجراں کی جانب سے فلسطینی مسلمانوں پر جاری اسرائیلی مظالم کے خلاف اور پاک فوج کے ساتھ یکجہتی کے اظہار کے لیے ایک عظیم الشان احتجاجی ریلی نکالی گئی۔
ریلی مین بازار سے شروع ہو کر رکشہ اسٹینڈ، کالا گجراں پر اختتام پذیر ہوئی۔ سینکڑوں افراد، جن میں خواتین، بزرگ، نوجوان اور بچے شامل تھے نے اس پرامن احتجاج میں شرکت کی۔
مظاہرین نے ہاتھوں میں بینرز اور پلے کارڈز اٹھا رکھے تھے جن پر فلسطینی عوام، خصوصاً عورتوں اور بچوں پر ڈھائے جانے والے مظالم کی تصاویر اور تحریریں درج تھیں۔ اس کے ساتھ ساتھ پاک فوج کی حمایت میں نعرے بھی بلند کیے گئے۔
اسلام قریشی نے ریلی سے خطاب کرتے ہوئے کہا کہ ہم اپنے فلسطینی بہن بھائیوں کے ساتھ شانہ بشانہ کھڑے ہیں اور ہر ممکن تعاون کے لیے تیار ہیں۔ ہم اپنی بہادر افواج پاکستان کو سلام پیش کرتے ہیں جنہوں نے ہمیشہ ملک کی سالمیت اور امن کے لیے قربانیاں دی ہیں۔
ڈاکٹر شہزانہ امتیاز نے عالمی برادری سے مطالبہ کیا کہ وہ فلسطین میں جاری ظلم و ستم کا فوری نوٹس لے اور ظالموں کو لگام دی جائے۔ میڈم فرزانہ نے فلسطین کے بچوں، خواتین اور بزرگوں کو خراجِ عقیدت پیش کرتے ہوئے کہا کہ ان کی قربانیاں تاریخ میں سنہری حروف سے لکھی جائیں گی۔
ریلی کے اختتام پر شرکاء نے اجتماعی دعا کی کہ فلسطینی عوام کو آزادی اور انصاف نصیب ہو اور پاکستان کو اندرونی و بیرونی خطرات سے محفوظ رکھا جائے۔
