جہلم: سیکرٹری ایمرجنسی ڈیپارٹمنٹ ڈاکٹر رضوان نصیر اور ڈپٹی کمشنر جہلم میر رضا اوزگن کی ہدایات پر ریسکیو 1122 نے ضلع بھر کی اہم ہائی رائز بلڈنگز کی جامع انسپکشن مہم شروع کر دی ہے۔
اس مہم کی قیادت ڈسٹرکٹ ایمرجنسی آفیسر انجینئر سعید احمد کر رہے ہیں، جس کے دوران بلڈنگ مالکان اور انتظامیہ کو فائر سیفٹی سے متعلق اہم نکات پر تفصیلی بریفنگ دی جا رہی ہے۔
انسپکشن کے دوران واضح ہدایات جاری کی گئی ہیں کہ تمام عمارات میں فائر سیفٹی آلات، ایمرجنسی انٹری و ایگزٹ پوائنٹس، فائر الارم سسٹم، سموک ڈیٹیکٹرز اور دیگر حفاظتی انتظامات مقررہ معیار کے مطابق مکمل کیے جائیں۔
متعلقہ عمارتوں کو 15 روزہ نوٹسز جاری کر دیے گئے ہیں جن میں خبردار کیا گیا ہے کہ مقررہ مدت میں انتظامات مکمل نہ ہونے کی صورت میں بھاری جرمانہ، قانونی کارروائی اور عمارت کو سیل کرنے جیسے سخت اقدامات کیے جائیں گے۔
اس موقع پر ڈسٹرکٹ ایمرجنسی آفیسر انجینئر سعید احمد نے کہا کہ ان اقدامات کا بنیادی مقصد عوام کی جان و مال کا تحفظ اور کسی بھی ناگہانی صورتحال میں بروقت اور مؤثر رسپانس کو یقینی بنانا ہے۔
انہوں نے زور دیا کہ فائر سیفٹی ضوابط پر مکمل عملدرآمد کے بغیر کسی بھی عمارت کو محفوظ قرار نہیں دیا جا سکتا۔
