پنڈ دادنخان کے علاقے جلالپور شریف میں مبینہ گھریلو تنازع کے بعد ایک نوجوان نے گندم کو محفوظ رکھنے کے لیے استعمال ہونے والی زہریلی گولیاں کھا لیں، جس کے باعث اس کی حالت تشویشناک ہو گئی۔
تفصیلات کے مطابق جہلم کی تحصیل پنڈدادنخان کے علاقے جلالپور شریف میں کامران گل ولد گل محمد نے مبینہ طور پر گھریلو ناچاقی کے باعث زہریلی گولیاں نگل لیں۔ واقعے کی اطلاع ملتے ہی اہل خانہ نے انہیں فوری طور پر قریبی مرکزِ صحت منتقل کیا، جہاں ابتدائی طبی امداد فراہم کرنے کے بعد تشویشناک حالت کے پیش نظر انہیں مزید علاج کے لیے ڈسٹرکٹ ہیڈ کوارٹر (ڈی ایچ کیو) اسپتال جہلم ریفر کر دیا گیا۔
اسپتال ذرائع کے مطابق نوجوان کو طبی امداد فراہم کی جا رہی ہے، تاہم اس کی حالت تشویشناک بتائی جا رہی ہے۔ واقعے کی وجوہات اور دیگر پہلوؤں سے متعلق متعلقہ ادارے تحقیقات کر رہے ہیں۔
