دینہ: منشیات فروش کو جرم ثابت ہونے پر 16 سال قید اور جرمانے کی سزا سنا دی گئی۔
تفصیلات کے مطابق منشیات فروشی کے مقدمے میں جہلم کی معزز عدالت نے جرم ثابت ہونے پر منشیات فروش کو 16 سال قید اور 5 لاکھ روپے جرمانے کی سزا سنا دی۔ عدالت نے مقدمہ نمبر 260/24 بجرم CNSA 9(i)3E تھانہ منگلا کینٹ کا تفصیلی فیصلہ جاری کیا۔
مجرم تصور حسین نے سال 2024 میں منشیات فروشی کے جرم کا ارتکاب کیا تھا۔ جہلم پولیس نے بروقت کارروائی کرتے ہوئے مجرم کو ٹریس کر کے گرفتار کیا اور ٹھوس شواہد کے ساتھ چالان عدالت میں پیش کیا۔ مقدمے کی مؤثر پیروی کے نتیجے میں معزز عدالت نے جرم ثابت ہونے پر مجرم کو قرار واقعی سزا سنائی۔
ڈی پی او جہلم نے فیصلے پر ردِعمل دیتے ہوئے کہا کہ منشیات فروش معاشرے کا ناسور ہیں اور ان کے مکمل خاتمے کے لیے بھرپور آپریشن جاری رہے گا۔ انہوں نے اس کامیاب کارروائی پر جہلم پولیس کی انوسٹیگیشن اور لیگل ٹیموں کی کارکردگی کو سراہتے ہوئے شاباش دی اور ٹیموں کے لیے تعریفی سرٹیفکیٹس اور نقد انعامات دینے کا اعلان کیا۔
ضلعی پولیس حکام کے مطابق منشیات کے خلاف زیرو ٹالرنس پالیسی کے تحت کارروائیاں آئندہ بھی بلا امتیاز جاری رہیں گی تاکہ نوجوان نسل اور معاشرے کو اس لعنت سے محفوظ رکھا جا سکے۔
