پنڈدادنخان: غفلت اور لاپرواہی سے ٹرک چلا کر 7 سالہ بچے کو جاں بحق کرنے والے ملزم کو گرفتار کر لیا۔
تفصیلات کے مطابق جہلم کی تحصیل پنڈدادنخان میں ایس ایچ او تھانہ پنڈدادنخان اور پولیس ٹیم نے کارروائی کرتے ہوئے غفلت اور لاپرواہی سے ٹرک چلا کر 7 سالہ بچے کو کچلنے والے ٹرک ڈرائیور کو گرفتار کر لیا۔
گزشتہ ماہ ملزم نے انتہائی غفلت اور لاپرواہی کا مظاہرہ کرتے ہوئے ٹرک چلایا، جس کے نتیجے میں کمسن بچہ کچلا گیا اور موقع پر ہی جاں بحق ہو گیا۔ افسوسناک واقعے کے بعد ملزم کے خلاف تھانہ پنڈدادنخان میں مقدمہ درج کر کے قانونی کارروائی کا آغاز کر دیا گیا ہے۔
پولیس حکام کا کہنا ہے کہ ملزم کے خلاف ٹھوس شواہد اکٹھے کر لیے گئے ہیں اور اسے مکمل قانونی تقاضے پورے کرنے کے بعد چالان عدالت پیش کیا جائے گا، تاکہ اسے قانون کے مطابق قرار واقعی سزا دلوائی جا سکے۔
اس حوالے سے ڈسٹرکٹ پولیس آفیسر جہلم طارق عزیز سندھو نے کہا کہ شہریوں کی جان و مال کا تحفظ پولیس کی اولین ترجیح ہے۔ انہوں نے واضح کیا کہ سنگین نوعیت کے مقدمات میں ملوث ملزمان کسی رعایت کے مستحق نہیں اور ایسے عناصر کے خلاف بلاامتیاز سخت کارروائی عمل میں لائی جائے گی۔
