جہلم: ڈپٹی کمشنر جہلم میر رضا اوزگن نے گورنمنٹ ہائی سکول کالا ڈیپو کا دورہ کیا جہاں انہوں نے تعلیمی انتظامات اور سہولیات کا تفصیلی جائزہ لیا۔
دورے کا مقصد اسکولوں میں تعلیمی معیار کو بہتر بنانا اور طلباء کو بنیادی سہولیات کی بہتر فراہمی کو یقینی بنانا تھا۔ ڈپٹی کمشنر نے کلاس رومز، سائنس لیبارٹریز، اساتذہ کی حاضری اور اسکول کے ریکارڈ کا معائنہ کیا۔
اس موقع پر انہوں نے طلباء سے سوالات پوچھ کر ان کی تعلیمی استعداد کا جائزہ بھی لیا۔ ڈی سی جہلم نے اسکول میں موجود بنیادی سہولیات، خصوصاً فرنیچر، بیت الخلا اور پینے کے صاف پانی کی دستیابی کا بغور معائنہ کرتے ہوئے انتظامیہ کو ہدایات جاری کیں۔
انہوں نے کہا کہ طلباء کی تعلیم پر کوئی سمجھوتہ نہیں کیا جائے گا اور اساتذہ اپنی ذمہ داریاں پوری ایمانداری سے نبھائیں۔ ڈپٹی کمشنر نے اسکول انتظامیہ کو تعلیمی ماحول مزید بہتر بنانے کی تاکید کرتے ہوئے کہا کہ بچوں کو بہتر سہولیات فراہم کرنا ضلعی انتظامیہ کی اولین ترجیح ہے۔
