جہلم: ایڈیشنل ڈپٹی کمشنر جنرل جہلم صباء سحر کے تبادلے کے موقع پر ضلعی انتظامیہ جہلم کی جانب سے ایک پروقار الوداعی تقریب کا اہتمام کیا گیا۔
یہ تقریب ان کی شاندار خدمات کے اعتراف اور نئی ذمہ داریوں کے لیے نیک خواہشات کے اظہار کے لیے منعقد کی گئی۔ تقریب میں ڈپٹی کمشنر جہلم میر رضا اوزگن، ڈسٹرکٹ پولیس آفیسر جہلم طارق عزیز سندھو سمیت ضلعی انتظامیہ کے دیگر افسران نے خصوصی طور پر شرکت کی۔ تقریب کا آغاز تلاوتِ کلامِ پاک سے ہوا جس کے بعد شرکاء نے صباء سحر کی خدمات پر خراجِ تحسین پیش کیا۔
ڈپٹی کمشنر میر رضا اوزگن نے اپنے خطاب میں کہا کہ صباء سحر نے جہلم میں بطور ایڈیشنل ڈپٹی کمشنر جنرل اپنے فرائض انتہائی محنت، دیانت داری اور پیشہ ورانہ مہارت کے ساتھ سرانجام دیے۔
انہوں نے کہا کہ صباء سحر نے عوامی مسائل کے حل اور انتظامی معاملات میں غیر معمولی کارکردگی کا مظاہرہ کیا، جس کی بدولت ضلع جہلم میں عوامی خدمات میں بہتری آئی۔ انہوں نے ان کی انتظامی صلاحیتوں، خوش اخلاقی اور ٹیم ورک کی تعریف کرتے ہوئے امید ظاہر کی کہ وہ اپنی نئی پوسٹنگ پر بھی اسی جذبے اور محنت سے کام جاری رکھیں گی۔
ڈی پی او جہلم طارق عزیز سندھو نے بھی صباء سحر کی پیشہ ورانہ صلاحیتوں کو سراہتے ہوئے کہا کہ انہوں نے ہمیشہ اداروں کے درمیان بہترین کوآرڈینیشن قائم رکھی اور عوامی مفاد کے لیے بھرپور کردار ادا کیا۔
دیگر افسران نے بھی تقریب سے خطاب کرتے ہوئے محترمہ صباء سحر کے ساتھ اپنے کام کے تجربات کو خوشگوار قرار دیا اور ان کے لیے نیک تمناؤں کا اظہار کیا۔ ان کا کہنا تھا کہ صباء سحر کی قیادت میں کئی انتظامی امور بہتر انداز میں سرانجام پائے اور ان کا نرم مزاج اور پیشہ ورانہ طرزِ عمل سب کے لیے قابلِ تقلید رہا۔
تقریب کے اختتام پر ڈپٹی کمشنر جہلم میر رضا اوزگن، ڈی پی او طارق عزیز سندھو اور دیگر افسران نے صباء سحر کو ان کی شاندار خدمات کے اعتراف میں یادگاری تحائف پیش کیے۔ انہیں عزت و احترام کے ساتھ رخصت کیا گیا۔
اس موقع پر ایڈیشنل ڈپٹی کمشنر جنرل صباء سحر نے بھی اظہارِ خیال کرتے ہوئے کہا کہ جہلم میں گزارا ہوا وقت ان کی زندگی کا یادگار ترین دور رہا۔ انہوں نے کہا کہ جہلم کے عوام اور انتظامیہ کا تعاون ہمیشہ ان کے ساتھ رہا، جس پر وہ شکر گزار ہیں۔ انہوں نے ڈپٹی کمشنر میر رضا اوزگن اور تمام افسران کا شکریہ ادا کیا جنہوں نے ان کی خدمات کو سراہا اور الوداعی تقریب کے ذریعے ان کے لیے محبت اور احترام کا اظہار کیا۔
صباء سحر نے کہا کہ وہ جہلم کے عوام اور انتظامیہ کے خلوص و محبت کو ہمیشہ یاد رکھیں گی اور اپنی آئندہ ذمہ داریوں میں بھی اسی جذبے سے عوامی خدمت جاری رکھیں گی۔
