جدہ: سعودی عرب کے شہر جدہ میں پاکستان پیپلزپارٹی سعودی عرب کے صدر تصور چوہدری نے پاکستان سے آئے پیپلز پارٹی کے رہنما و پی پی پی لاہور کے سیکرٹری فنانس اشرف خان کے اعزاز میں تقریب منعقد کی گئی جس میں پیپلز پارٹی سعودی عرب کے رہنماؤں نے شرکت کی اور پارٹی امور ، پاکستان میں آئندہ آنے والے انتخابات پر اظہارِ خیال کیا۔
اس موقع پر پیپلزپارٹی کے صدر چوہدری تصور اور سینئر نائب صدر ملک جاوید نے کہا کہ قائد عوام شہید ذوالفقار علی بھٹو کے فلسفہ سیاست کی جنت عوام کے قدموں میں ہے اور وہ ہمارے لیے مشعلِ راہ ہے اور پیپلزپارٹی ہی وہ واحد جماعت ہے جو عوامی طاقت پر یقین رکھتی ہے اور ہمیشہ عوام ہی انھیں اقتدار میں لیکر آئے ہیں اور عام انتخابات میں پیپلز پارٹی بھر پور کامیابی حاصل کرے گی اور بلاول بھٹو پاکستان کے وزیراعظم ہونگے۔
سیکرٹری جنرل پیپلز یوتھ PYO گلف میڈل ایسٹ سردار وقاص عنایت نے کہا کہ پیپلز پارٹی کے روٹی کپڑا اور مکان کے وعدہ کی بدولت ایک کڑور کے قریب آج دیارِ غیر میں بیٹھے اورسیز پاکستانی ملک کی اکانومی کو سہارا دیے ہوئے ہیں ۔
ڈپٹی سیکرٹری جنرل آفتاب ترابی، پی پی پی جدہ سٹی کے صدر راجہ اعجاز جنجوعہ، پی پی پی کےسینئر رہنماؤں اسد اکرم اور سید فضل عباس سمیت دیگر نے پاکستان سے آئے ہوئے مہمان اشرف خان کو روضہ رسول ﷺ پر حاضری اور عمرہ کی ادائیگی پر مبارکباد پیش کی اور کہا کہ آج تھر کے عوام نے چیئرمین بلاول بھٹو کا شاندار استقبال کر کے اپنا فیصلہ پیپلز پارٹی کے حق میں سنا دیا ہے۔
مہمانِ خصوصی اشرف خان نے تصور چوہدری اور تمام دوستوں کا شکریہ ادا کیا اور کہا کہ لاہور پیپلز پارٹی کا گڑھ رہا ہے اور اس دفعہ پیپلز پارٹی پورے پاکستان اور خاص کر سندھ اور پنجاب میں بھرپور کامیابی حاصل کرے گی اور ہمیں اپنی لیڈر شپ پر بھروسہ کرنا چاہیے۔
