جہلم: نماز فجر کی ادائیگی کے لیے مسجد جانے والے لڑکے کو پالتو کتے نے کاٹ کر شدید زخمی کردیا جبکہ پولیس نے کتے کے مالک کو گرفتار کرکے مقدمہ درج کرلیا۔
تفصیلات کے مطابق واقعہ آج صبح اس وقت پیش آیا جب شعبان نامی لڑکا نماز فجر کے لیے مسجد جا رہا تھا کہ ایک پالتو کتے نے اس پر حملہ کردیا اور اسے کاٹ کر شدید زخمی کردیا۔ لڑکے کی چیخ و پکار سن کر اہلِ علاقہ گھروں سے باہر آگئے اور زخمی شعبان کو فوری طور پر قریبی اسپتال منتقل کیا۔
اسپتال میں ابتدائی طبی امداد فراہم کرنے کے بعد شعبان کو مزید علاج اور ضروری ویکسینیشن کے لیے راولپنڈی اسپتال منتقل کردیا گیا۔
دوسری جانب متاثرہ لڑکے کے والد کی مدعیت میں تھانہ سٹی پولیس نے مقدمہ درج کرکے کتے کے مالک کو گرفتار کرلیا۔
پولیس کے مطابق شہری کی جانب سے درخواست موصول ہوئی تھی کہ مذکورہ شخص کا کتا راہگیروں کو کاٹتا ہے اور علاقے میں خوف و ہراس کا باعث بنا ہوا ہے۔ کتے کے مالک کو متعدد مرتبہ مناسب انتظام کرنے کے لیے کہا گیا، تاہم اس نے مبینہ طور پر کوئی موثر اقدام نہیں کیا۔
ڈی پی او جہلم شفیق احمد چوہدری نے کہا کہ شہریوں کی جان و مال کے تحفظ میں غفلت یا لاپرواہی کسی صورت برداشت نہیں کی جائے گی اور عوامی شکایات پر فوری قانونی کارروائی یقینی بنائی جائے گی۔
واضح رہے کہ ملک کے مختلف شہروں میں آوارہ اور پالتو کتوں کے کاٹنے کے واقعات شہریوں کے لیے تشویش کا باعث بن رہے ہیں، جبکہ شہریوں کی جانب سے ایسے واقعات کی روک تھام کے لیے مؤثر اقدامات کا مطالبہ کیا جاتا رہا ہے۔
