جہلم: پی ٹی سی ایل کے سابق سپر وائزر اور معروف سماجی شخصیت چوہدری عبدالکلام گزشتہ روز قضائے الٰہی سے انتقال کر گئے، جس پر شہر بھر میں افسوس کی لہر دوڑ گئی۔
مرحوم کی نمازِ جنازہ ان کے آبائی گاؤں حاجی آئمہ میں سہ پہر ساڑھے چار بجے ادا کی گئی، جس میں پی ٹی سی ایل کے سابق افسران و اہلکاروں کے علاوہ شہر کی سماجی، رفاہی، فلاحی، مذہبی، صحافتی، وکلا تنظیموں کے نمائندگان سمیت ہر مکتبہ فکر سے تعلق رکھنے والے افراد نے بڑی تعداد میں شرکت کی۔ اس موقع پر مرحوم کے درجات کی بلندی اور مغفرت کے لیے خصوصی دعا بھی کی گئی۔
چوہدری عبدالکلام اپنی شرافت، دیانت داری اور اعلیٰ اخلاق کے باعث حلقہ احباب میں انتہائی قدر و منزلت کی نگاہ سے دیکھے جاتے تھے۔ انہوں نے اپنی زندگی علاقہ کے عوام کی خدمت اور فلاحی کاموں کے لیے وقف کر رکھی تھی، جس کی وجہ سے وہ ہر دلعزیز شخصیت کے طور پر جانے جاتے تھے۔
اہل علاقہ کا کہنا ہے کہ مرحوم نہایت ملنسار، بردبار اور مخلص انسان تھے، جنہوں نے اپنی شخصیت اور کردار سے بے شمار لوگوں کے دل جیتے۔ ان کی وفات سے پیدا ہونے والا خلا مدتوں پُر نہیں ہو سکے گا۔
مختلف طبقات سے تعلق رکھنے والے افراد نے مرحوم کی خدمات کو خراجِ عقیدت پیش کرتے ہوئے کہا کہ وہ ایک باوقار اور نیک سیرت انسان تھے جن کی زندگی دوسروں کے لیے مشعلِ راہ ہے۔ آخر میں دعا کی گئی کہ اللہ تعالیٰ چوہدری عبدالکلام مرحوم کو جوارِ رحمت میں اعلیٰ مقام عطا فرمائے اور پسماندگان کو صبرِ جمیل عطا کرے۔
