جہلم:وزیراعلیٰ پنجاب کے “روشن پنجاب” ویژن کی تکمیل اور ڈپٹی کمشنر جہلم میر رضا اوزگن کی خصوصی ہدایت پر جہلم شہر کی اہم شاہراہوں اور چوراہوں کو جدید اور دیدہ زیب رنگین لائٹس سے روشن کر دیا گیا ہے۔
ضلعی انتظامیہ کے مطابق بیوٹی فکیشن پلان کے تحت شہر کے نمایاں مقامات پر جدید طرز کی لائٹنگ نصب کی جا رہی ہے، جس سے نہ صرف جہلم کی رونق میں اضافہ ہوا ہے بلکہ رات کے وقت شہر کا منظر بھی انتہائی دلکش ہو گیا ہے۔ یہ رنگین لائٹس شہریوں کے ساتھ ساتھ سیاحوں کی توجہ کا مرکز بنی ہوئی ہیں اور شہر کا مثبت تاثر اجاگر کر رہی ہیں۔
ڈپٹی کمشنر جہلم میر رضا اوزگن نے جاری کاموں کی نگرانی کرتے ہوئے کہا کہ شہر کی خوبصورتی اور شہریوں کو بہتر سہولیات کی فراہمی ضلعی انتظامیہ کی اولین ترجیحات میں شامل ہے۔ انہوں نے متعلقہ محکموں کو ہدایت کی کہ نصب کی گئی لائٹس کی باقاعدہ دیکھ بھال اور بروقت مرمت کو یقینی بنایا جائے تاکہ شہر کی روشنی اور دلکشی مستقل برقرار رہ سکے۔
شہریوں نے ضلعی انتظامیہ کے اس اقدام کو سراہتے ہوئے کہا کہ رنگین لائٹس کی تنصیب سے رات کے وقت جہلم شہر کا منظر مزید خوبصورت ہو گیا ہے اور سڑکوں پر سفر کرنے والوں کے لیے سہولت اور تحفظ میں بھی اضافہ ہوا ہے۔
ڈپٹی کمشنر جہلم نے عزم ظاہر کیا کہ وزیراعلیٰ پنجاب کے ویژن کے مطابق جہلم کو ایک مثالی، جدید اور خوبصورت شہر بنانے کے لیے آئندہ بھی مزید ترقیاتی اور بیوٹی فکیشن منصوبے شروع کیے جائیں گے۔
