جہلم: قتل یا خودکشی؛ جہلم کے نواحی علاقہ میں 16 سالہ لڑکی گولی لگنے سے جاں بحق ہو گئی۔
تفصیلات کے مطابق جہلم کے تھانہ چوٹالہ کے علاقے ہون ہموالہ میں ایک افسوسناک واقعہ پیش آیا، جہاں 16 سالہ لڑکی (آ.س) گولی لگنے کے باعث جاں بحق ہو گئی۔
پولیس نے ابتدائی طور پر واقعے کی تفتیش شروع کر دی ہے اور مختلف پہلوؤں کا جائزہ لے رہی ہے۔ پولیس نے لڑکی کی لاش کو تحویل میں لے کر پوسٹمارٹم کیلئے ڈسٹرکٹ ہیڈ کوارٹر ہسپتال جہلم منتقل کر دیا ہے۔
پولیس حکام کے مطابق لڑکی کو مبینہ طور پر گولی مار کر قتل کیا گیا ہے اور واقعے کی ایف آئی آر پولیس کی مدعیت میں درج کی جا رہی ہے۔ مزید تحقیقات کے لیے پولیس نے لڑکی کے دو بھائیوں سمیت پانچ افراد کو حراست میں لے لیا ہے۔
ادھر لڑکی کی والدہ کا کہنا ہے کہ ان کی بیٹی اپنے موبائل فون کے ساتھ پسٹل کے ذریعے ٹک ٹاک کیلئے ویڈیو بنا رہی تھی کہ اچانک حادثاتی طور پر گولی چل گئی۔
پولیس حکام کا کہنا ہے کہ لواحقین کے بیانات میں تضاد پایا گیا ہے، جس کی وجہ سے یہ واقعہ مشکوک ہو گیا ہے۔ پولیس کے مطابق پوسٹ مارٹم رپورٹ کے بعد اصل حقائق سامنے آئیں گے اور مزید کارروائی کی جائے گی۔
