جہلم: پیر سید ریاض حسین شاہ نے کہا ہے کہ اللہ تعالیٰ نے ہمیں تمام امتوں سے بہتر امت بنا کر اور اپنے محبوب نبی حضرت محمد ﷺ کا امتی بنا کر ہم پر عظیم احسان فرمایا ہے۔ حضور نبی کریم ﷺ کی شفاعت ہی ہماری نجات کا ذریعہ بنے گی۔
خطیب اعظم مدنی جامعہ مسجد نئی آبادی کھرالہ پیر سید ریاض حسین شاہ نے صحافیوں سے خصوصی گفتگو کرتے ہوئے کہا کہ اللہ تعالیٰ اور اس کے فرشتے ہمیشہ حضور نبی کریم ﷺ کا ذکر کرتے رہتے ہیں اور اہل ایمان کے لیے میلاد مصطفیٰ ﷺ کی محافل کا انعقاد، درود و سلام کے نذرانے پیش کرنا باعثِ اجر و ثواب ہے۔
انہوں نے کہا کہ سیرت طیبہ کا ہر گوشہ روشن اور تابناک ہے، اور جو شخص اسوۂ رسول ﷺ کو اپنا لے، وہ دنیا اور آخرت دونوں میں عزت و کامیابی حاصل کر سکتا ہے۔
پیر سید ریاض حسین شاہ نے مزید کہا کہ ہمیں چاہیے کہ ہم نبی کریم ﷺ کی تعلیمات کو اپنی زندگیوں میں عملی طور پر اپنائیں تاکہ ہم بحیثیت امت، اپنا کھویا ہوا مقام دوبارہ حاصل کر سکیں۔
