جہلم میں موسلادھار بارش کے باعث سول لائن روڈ پر واقع گورنمنٹ الطاف ہائی سکول کے ایک کمرے کی چھت اور دیوار کا حصہ گر گیا۔ حادثے کے نتیجے میں ملبے کے نیچے موجود موٹرسائیکل سمیت قیمتی سامان کو نقصان پہنچا۔
واقعہ کی اطلاع ملتے ہی پولیس اور ریسکیو 1122 کی ٹیمیں موقع پر پہنچ گئیں اور صورتحال کا جائزہ لیا۔ ریسکیو ذرائع کے مطابق متاثرہ کمرہ پرانا اور بوسیدہ تھا، جس کے باعث بارش کے دباؤ سے اس کا کچھ حصہ منہدم ہوا۔ خوش قسمتی سے اس حادثے میں کسی قسم کا جانی نقصان نہیں ہوا۔
ریسکیو ذرائع کا کہنا ہے کہ سکول کے باقی کمرے بالکل محفوظ ہیں اور انہیں کسی قسم کا نقصان نہیں پہنچا۔ تاہم، واقعہ نے شہریوں اور والدین میں تشویش پیدا کردی ہے۔
علاقہ مکینوں اور والدین نے حکومت پنجاب اور محکمہ تعلیم سے مطالبہ کیا ہے کہ ضلع بھر کے سرکاری تعلیمی اداروں کی عمارتوں کا فوری سروے کیا جائے تاکہ بوسیدہ اور خطرناک عمارتوں کی مرمت یا تعمیر نو کی جاسکے اور بچوں کو کسی بڑے حادثے سے محفوظ رکھا جا سکے۔
