جہلم: ڈپٹی کمشنر جہلم میر رضا اوزگن نے کہا ہے کہ تعلیمی اداروں کی کارکردگی کو بہتر بنانے کے لئے ہر ممکن اقدامات عمل میں لائے جا رہے ہیں تاکہ طلبہ و طالبات کو بہترین تعلیمی ماحول فراہم کیا جا سکے۔
یہ بات انہوں نے جونیئر ماڈل سکول بلال ٹاؤن اور تبلیغ الاسلام ہائی سکول کے دورے کے موقع پر کہی۔ ڈپٹی کمشنر نے کلاس رومز میں جا کر تعلیمی عمل کا مشاہدہ کیا، اساتذہ اور طلبہ سے نصابی سرگرمیوں پر گفتگو کی اور سکول انتظامیہ سے طلبہ و طالبات کے لیے سہولیات کی فراہمی کے حوالے سے بریفنگ لی۔
اس موقع پر ڈپٹی کمشنر نے سکول پرنسپل کو ہدایت کی کہ گرمیوں کی تعطیلات کے بعد طلبہ کو بھرپور توجہ اور محنت کے ساتھ زیورِ تعلیم سے آراستہ کیا جائے اور آئندہ امتحانات کے لئے بہترین تیاری کروائی جائے۔ انہوں نے مزید کہا کہ اساتذہ کی بروقت حاضری اور ذمہ داری کا احساس طلبہ کی کامیابی کے لئے ناگزیر ہے، اس پر کسی قسم کی کوتاہی برداشت نہیں کی جائے گی۔
ڈپٹی کمشنر میر رضا اوزگن نے کہا کہ ضلع جہلم کے تمام تعلیمی اداروں میں تدریسی عمل، بنیادی سہولیات اور طلبہ کی فلاح و بہبود پر خصوصی توجہ دی جا رہی ہے تاکہ تعلیمی معیار کو بہتر سے بہترین بنایا جا سکے۔
