جہلم: گوجرخان سے بھاگ شادی کرنے والی لڑکی اور لڑکا جہلم سے اغوا، جہلم پولیس نے بروقت کارروائی کرتے ہوئے لڑکی اور لڑکے کو بازیاب کروا کر دو ملزمان کو گرفتار کر لیا۔
تفصیلات کے مطابق جہلم کے علاقے جادہ سے اغواء کیے گئے لڑکی اور لڑکے کو پولیس نے بازیاب کرا لیا ہے۔ پولیس نے برق رفتاری سے کارروائی کرتے ہوئے گوجرخان سے دو ملزمان کو گرفتار کر لیا، جبکہ باقی ملزمان کی گرفتاری کے لیے چھاپے مارے جا رہے ہیں۔
گزشتہ روز جادہ چوک کے قریب دن دیہاڑے دو گاڑیوں میں سوار 6 سے 7 مسلح افراد نے ایک نوجوان لڑکی اور لڑکے کو اغواء کر لیا۔ دونوں نے ایک روز قبل گھر سے بھاگ کر پسند کی شادی کی تھی اور گوجرخان کے رہائشی تھے۔
@jhelumupdates جہلم: گوجرخان سے بھاگ کر شادی کرنے والے لڑکی اور لڑکا جہلم سے اغوا، جہلم پولیس نے دونوں کو بازیاب کروا لیا #JhelumUpdates #LatestNews #fyp #breakingnews #foryoupagе #viralvideos ♬ original sound – Jhelum Updates
واقعے کی ویڈیو جہلم پریس کلب کے ممبر چوہدری دانیال عابد نے موقع پر بنا کر تھانہ سٹی کے ایس ایچ او چوہدری اللہ دتہ کو بھجوائی۔ ویڈیو میں واضح طور پر دیکھا جا سکتا ہے کہ عوام اغواء کاروں کو روکنے کی کوشش کر رہے ہیں اور ان سے منت سماجت کر رہے ہیں، تاہم اغواء کار اسلحہ کی نوک پر جوڑے کو زبردستی گاڑی میں ڈال کر فرار ہونے میں کامیاب ہو گئے۔
ایس ایچ او چوہدری اللہ دتہ نے ٹیم کے ہمراہ فوری کارروائی کرتے ہوئے سیف سٹی کیمروں کے ذریعے ملزمان کا سراغ لگایا اور گوجرخان سے دو اغواء کاروں کو گرفتار کر کے مغوی لڑکی اور لڑکے کو بازیاب کرا لیا۔ پولیس کے مطابق گرفتار ملزمان سے تفتیش جاری ہے جبکہ باقی مفرور ملزمان کی گرفتاری اور واردات میں استعمال ہونے والی گاڑیوں کی برآمدگی کے لیے کوششیں جاری ہیں۔
پولیس کا کہنا ہے کہ قانون ہاتھ میں لینے والوں کے خلاف سخت کارروائی عمل میں لائی جائے گی اور کسی کو بھی خودساختہ فیصلے کرنے کی اجازت نہیں دی جائے گی۔
