منگلا ڈیم اور دریائے جہلم میں پانی کی آمد میں اضافہ، گرم موسم کے مثبت اثرات نمایاں ہونے لگے۔ ڈیم تیزی سے بھرنے لگا ہے جبکہ قابل استعمال پانی کے ذخیرے میں خاطر خواہ اضافہ ریکارڈ کیا گیا ہے، جس سے آنے والے مہینوں میں پانی کی قلت کے خدشات میں کمی کا امکان ہے۔
رپورٹ کے مطابق منگلا ڈیم میں گزشتہ ایک ماہ کے دوران قابل استعمال پانی کے ذخیرے میں 4 لاکھ 66 ہزار ایکڑ فٹ کا اضافہ ہوا ہے۔ ایک ماہ قبل یہ ذخیرہ 72 ہزار ایکڑ فٹ تھا جو اب بڑھ کر 5 لاکھ 38 ہزار ایکڑ فٹ ہو گیا ہے۔
ماہرین کا کہنا ہے کہ درجہ حرارت میں اضافے کے باعث برف پگھلنے کی رفتار تیز ہو گئی ہے، جس کا براہ راست فائدہ دریائے جہلم کے بہاؤ اور منگلا ڈیم کے ذخیرے کو ہو رہا ہے۔ اس پیشرفت کو زرعی شعبے کے لیے خوش آئند قرار دیا جا رہا ہے، خاص طور پر ان علاقوں کے لیے جہاں نہری نظام پر انحصار کیا جاتا ہے۔
متعلقہ اداروں نے عوام اور کسانوں کو مشورہ دیا ہے کہ وہ دستیاب پانی کو دانشمندی سے استعمال کریں تاکہ گرمیوں کے اختتام تک پانی کی دستیابی یقینی بنائی جا سکے۔
