جہلم: ایس ایچ او تھانہ سٹی جہلم قمر سلطان نے پتنگ بازی کے نقصانات سے آگاہی کے سلسلے میں شہریوں سے گفتگو کرتے ہوئے کہا کہ پتنگ بازی ایک خونی اور جان لیوا کھیل ہے، جس کے باعث کئی قیمتی جانیں ضائع ہو چکی ہیں اور متعدد افراد شدید زخمی ہو چکے ہیں۔
انہوں نے کہا کہ والدین کو اس خطرناک کھیل کی روک تھام کے لیے پولیس کا ساتھ دینا ہوگا اور اپنے بچوں کو اس کے خطرات سے آگاہ کرنا ہوگا۔
ایس ایچ او قمر سلطان نے مزید کہا کہ حکومت نے پتنگ بازی پر سخت پابندی عائد کر رکھی ہے اور خلاف ورزی کرنے والوں کے خلاف سخت قانونی کارروائی عمل میں لائی جائے گی۔ پتنگ بازی میں ملوث افراد کو قید اور جرمانے کی سزائیں دی جائیں گی۔
انہوں نے کہا کہ حکومت کی جانب سے پتنگ بازی کے خلاف خصوصی آگاہی مہم چلائی جا رہی ہے اور شہر سمیت ضلع بھر میں اس خونی کھیل کی ہرگز اجازت نہیں دی جائے گی۔ پتنگ فروخت کرنے اور اڑانے والوں کے خلاف مقدمات درج کیے جائیں گے اور سخت سزائیں دی جائیں گی۔
ایس ایچ او نے والدین سے اپیل کی کہ وہ اپنے بچوں کو اس جان لیوا کھیل سے دور رکھیں تاکہ کسی بھی ناخوشگوار واقعے سے بچا جا سکے اور قیمتی جانوں کا ضیاع روکا جا سکے۔ پولیس عوام کے تعاون سے اس خطرناک سرگرمی کے مکمل خاتمے کے لیے پرعزم ہے۔
