جہلم پولیس نے ضلع بھر میں سرچ آپریشنز کے دوران 6 اشتہاری مجرمان سمیت 7 ملزمان کو گرفتار کر لیا۔
رپورٹ کے مطابق ڈی پی او جہلم شفیق احمد چوہدری کی ہدایت پر ضلع بھر میں جرائم پیشہ عناصر کے خلاف سرچ آپریشنز اور کارروائیوں کا سلسلہ جاری ہے۔ اس سلسلے میں جہلم پولیس نے ضلع کے مختلف علاقوں میں 14 سرچ آپریشنز کیے، جن کے دوران چھ اشتہاری مجرمان سمیت مجموعی طور پر سات ملزمان کو گرفتار کر لیا گیا۔
ترجمان جہلم پولیس کے مطابق سرچ آپریشنز کے دوران 434 افراد، 152 گھروں اور 19 ہوٹلز و بس اسٹینڈز کو چیک کیا گیا۔ اس دوران مختلف کارروائیوں میں چھ اشتہاری مجرمان کو گرفتار کیا گیا، جبکہ ناجائز اسلحہ رکھنے والے ایک ملزم کو بھی حراست میں لے کر اس کے قبضے سے 9 ایم ایم پسٹل برآمد کر لیا گیا۔
ترجمان جہلم پولیس نے شہریوں سے اپیل کی ہے کہ وہ اپنے اردگرد کے ماحول پر کڑی نظر رکھیں اور کسی بھی مشکوک شخص، غیر قانونی طور پر مقیم فرد یا جرائم پیشہ سرگرمیوں میں ملوث عناصر کے بارے میں فوری طور پر پولیس کو اطلاع دیں۔
پولیس کے مطابق بروقت اطلاع کسی بڑے جرم کی روک تھام میں مددگار ثابت ہونے کے ساتھ معاشرے میں امن و امان کے قیام میں بھی اہم کردار ادا کرتی ہے۔ اگر کسی شہری کے علم میں کوئی ایسا شخص آئے جو بغیر کوائف کے رہائش پذیر ہو، مشتبہ سرگرمیوں میں ملوث ہو یا قانون کی خلاف ورزی کر رہا ہو تو فوری طور پر قریبی تھانے یا پولیس ایمرجنسی ہیلپ لائن 15 پر اطلاع دی جائے۔
اس موقع پر ڈی پی او جہلم شفیق احمد چوہدری نے کہا کہ شہریوں کی جان و مال کا تحفظ اور امن و امان کا قیام پولیس کی اولین ترجیح ہے۔ جرائم پیشہ عناصر کے خلاف بلاامتیاز کارروائیاں جاری رکھی جائیں گی اور کسی کو بھی قانون کی گرفت سے بچنے نہیں دیا جائے گا۔
