جہلم پولیس کی بروقت کارروائی، ہوائی فائرنگ اور دھمکیاں دینے والے ملزم کو اسلحہ سمیت گرفتار کر لیا۔
تفصیلات کے مطابق ڈی پی او جہلم طارق عزیز سندھو کی ہدایت پر ایس ایچ او تھانہ صدر اور ان کی ٹیم نے اہم کارروائی کرتے ہوئے ہوائی فائرنگ کر کے عوام میں خوف و ہراس پھیلانے اور جان سے مارنے کی دھمکیاں دینے والے ملزم کو گرفتار کر لیا۔
پولیس کے مطابق کارروائی کے دوران ملزم کے قبضے سے کلاشنکوف نما رائفل، 30 بور پستول اور ایمونیشن برآمد کر لیا گیا۔ ملزم کے خلاف ناجائز اسلحہ رکھنے اور عوامی امن میں خلل ڈالنے کے الزامات پر تھانہ صدر میں مقدمہ درج کر لیا گیا ہے۔
پولیس حکام کا کہنا ہے کہ قانون شکنی اور اسلحے کے ناجائز استعمال میں ملوث عناصر کو ہرگز رعایت نہیں دی جائے گی اور ایسے ملزمان کو سخت قانونی کارروائی کا سامنا کرنا پڑے گا۔
