جہلم اور گردونواح میں سورج آگ برسانے لگا، شدید گرمی نے شہریوں کی زندگی مفلوج کرکے رکھ دی۔ درجہ حرارت 46 ڈگری سینٹی گریڈ تک جا پہنچا، جس کے باعث شہر کے بازار سنسان اور گلی محلے ویران ہو گئے۔
عید الاضحیٰ کے پہلے روز سے جاری گرمی کی شدید لہر نے شہریوں کو گھروں کے اندر محصور کر دیا ہے۔ دن کے اوقات میں سڑکیں سنّاٹے کا منظر پیش کرتی ہیں جبکہ بازاروں میں خریداروں کی تعداد نہ ہونے کے برابر ہے۔ شہر کی مصروف ترین سڑکیں اور بازار بھی خالی دکھائی دے رہے ہیں جبکہ ٹریفک کی روانی میں بھی واضح کمی دیکھی جا رہی ہے۔
شدید گرمی کے باعث ہیٹ ویو کے خطرات میں اضافہ ہو گیا ہے۔ محکمہ صحت اور ماہرین نے شہریوں کو احتیاطی تدابیر اختیار کرنے کی ہدایت جاری کر دی ہے۔ ڈاکٹرز کا کہنا ہے کہ شہری بلا ضرورت گھروں سے باہر نکلنے سے گریز کریں، زیادہ سے زیادہ پانی اور مشروبات کا استعمال کریں اور ہلکے رنگ کے کپڑے پہنیں۔
ماہرین کا مزید کہنا ہے کہ گرمی سے محفوظ رہنے کے لیے دھوپ میں نکلتے وقت سر کو ڈھانپنے کے لیے کیپ یا چھتری کا استعمال کیا جائے، جبکہ دھوپ سے آنکھوں کو محفوظ رکھنے کے لیے سن گلاسز کا استعمال بھی مفید ہے۔
انتظامیہ اور طبی ماہرین نے شہریوں سے اپیل کی ہے کہ وہ گرمی کی شدت کو سنجیدہ لیتے ہوئے خود کو اور اپنے پیاروں کو ہیٹ اسٹروک جیسے خطرناک اثرات سے محفوظ رکھیں۔
