جہلم: ضلعی پولیس اور ٹریفک پولیس کی جانب سے ہیلمٹ کی مبینہ خلاف ورزی پر بچوں اور طالب علموں کے خلاف ایف آئی آرز کے اندراج، بھاری جرمانوں اور مال بردار گاڑیوں کے ریکارڈ توڑ چالانز پر شدید تشویش کا اظہار کیا جا رہا ہے۔ یہ اقدامات عوامی سطح پر بے چینی اور اضطراب میں اضافے کا سبب بن رہے ہیں۔
جہلم کی شہری، سماجی، رفاحی اور فلاحی تنظیموں کے عمائدین نے کہا ہے کہ ایسے اقدامات سے عوام اور جمہوری حکومت کے درمیان خلیج میں اضافہ ہوگا۔ ان کا کہنا ہے کہ بیرونِ ملک مقیم تارکینِ وطن اپنی زمینوں پر قبضوں کے مسائل کے باعث پہلے ہی شدید پریشانی کا شکار ہیں، جبکہ موجودہ صورتحال نے عوامی مسائل میں مزید اضافہ کر دیا ہے۔
سول سوسائٹی کے نمائندگان نے کہا کہ تاجر تنظیموں، سماجی حلقوں اور مقامی نمائندوں کو اعتماد میں لیے بغیر کیے گئے سخت انتظامی اقدامات سے کاروباری سرگرمیاں شدید متاثر ہوئی ہیں اور خوف و ہراس کی فضا قائم ہے۔ انہوں نے مطالبہ کیا کہ حکومت ایک واضح اور مستقل پالیسی اختیار کرے، تاکہ تاجروں کے گھروں کے چولہے بجھنے سے بچ سکیں اور عوام کو ریلیف مل سکے۔
