پنڈدادنخان میں پولیس نے موٹر سائیکل چور اور امانت میں خیانت کرنے والے ملزم کو گرفتار کر لیا۔
تفصیلات کے مطابق ضلع جہلم پولیس کی مجرمان کے خلاف کارروائیاں جاری ہیں، جلالپور شریف پولیس نے دو مختلف مقدمات میں اہم کامیابیاں حاصل کر لیں۔ ایک کارروائی میں موٹر سائیکل چوری کے مقدمہ میں ملوث ملزم کو گرفتار کر کے چوری شدہ موٹر سائیکل برآمد کر لی جبکہ دوسری کارروائی میں امانت میں خیانت کرنے والے ملزم کو گرفتار کر کے ایک لاکھ روپے نقدی برآمد کر لی گئی۔
ڈی پی او جہلم طارق عزیز سندھو کی خصوصی ہدایت پر ایس ایچ او تھانہ جلالپور شریف اور ان کی ٹیم نے بھرپور کارروائی کرتے ہوئے موٹر سائیکل چوری کے مقدمہ میں ملوث ملزم کو گرفتار کر لیا۔ پولیس نے ملزم کے قبضہ سے چوری شدہ موٹر سائیکل برآمد کر کے قانونی کارروائی مکمل کر لی ہے۔
اسی طرح ڈی پی او جہلم کی ہدایت پر ایس ایچ او تھانہ جلالپور شریف اور ٹیم نے ایک اور کامیاب کارروائی کرتے ہوئے امانت میں خیانت کے مقدمہ میں مطلوب ملزم کو بھی گرفتار کر لیا۔ پولیس کے مطابق ملزم کے قبضہ سے ایک لاکھ روپے نقدی برآمد کی گئی ہے، جبکہ اس کے خلاف تھانہ جلالپور شریف میں مقدمہ درج کر لیا گیا ہے۔
اس موقع پر ڈسٹرکٹ پولیس آفیسر جہلم طارق عزیز سندھو نے کہا کہ شہریوں کی جان و مال کا تحفظ جہلم پولیس کی اولین ترجیح ہے۔ جرائم پیشہ عناصر کے خلاف زیرو ٹالرنس پالیسی پر عمل جاری ہے اور کسی کو بھی قانون ہاتھ میں لینے کی اجازت نہیں دی جائے گی۔
