جہلم شہر اور گردونواح میں متعدد فوڈ پوائنٹس اور ہوٹل شہریوں کو ناقص، غیر معیاری اور مضر صحت اشیائے خورد و نوش فراہم کر رہے ہیں جبکہ پنجاب فوڈ اتھارٹی کی جانب سے اس سنگین مسئلے پر کسی قسم کی مؤثر کارروائی دیکھنے میں نہیں آ رہی۔
ذرائع کے مطابق جہلم شہر کے مختلف ہوٹلز اور کھانے پینے کے مراکز پر حفظان صحت کے اصولوں کو مکمل طور پر نظر انداز کیا جا رہا ہے۔ کھانے کی تیاری میں غیر معیاری اور ملاوٹ شدہ اجزاء استعمال کیے جا رہے ہیں، جس کے نتیجے میں شہری بڑی تعداد میں پیٹ کی مختلف بیماریوں کا شکار ہو رہے ہیں اور مقامی ہسپتالوں میں ایسے مریضوں کی تعداد میں خطرناک حد تک اضافہ دیکھنے میں آ رہا ہے۔
شہریوں نے اس صورت حال پر شدید تشویش کا اظہار کرتے ہوئے پنجاب فوڈ اتھارٹی سے فوری نوٹس لینے کا مطالبہ کیا ہے۔ عوامی حلقوں کا کہنا ہے کہ نہ صرف کھانے پینے کی اشیاء کی کوالٹی چیک کی جائے بلکہ ان اشیاء کو تیار کرنے والے افراد کے میڈیکل سرٹیفکیٹس کی بھی جانچ پڑتال کی جائے، تاکہ بیماریوں کے پھیلاؤ کو روکا جا سکے۔
عوام نے مطالبہ کیا ہے کہ ضلع بھر میں تمام فوڈ پوائنٹس کے کچن کی باقاعدہ انسپیکشن کی جائے اور جو ہوٹل یا فوڈ پوائنٹ صحت کے معیار پر پورا نہ اترے، ان کے خلاف سخت قانونی کارروائی کی جائے۔
