جہلم سمیت پنجاب بھر میں ڈرائیونگ لائسنس کے حصول کے لیے متعارف کرایا گیا جدید نظام شہریوں کے لیے مشکلات کا باعث بن گیا ہے، جہاں متعدد درخواست گزاروں کو کئی ماہ گزرنے کے باوجود اصل لائسنس موصول نہیں ہو سکے۔
جہلم کے محلہ پروفیسر کالونی کے رہائشی چوہدری عابد محمود نے میڈیا سے گفتگو کرتے ہوئے بتایا کہ انہوں نے تمام قانونی مراحل مکمل کرنے کے بعد ڈرائیونگ لائسنس کے لیے درخواست جمع کروائی تھی۔ ان کے مطابق سسٹم میں ای-لائسنس جاری دکھایا جا رہا ہے، تاہم کارڈ کی صورت میں اصل لائسنس تاحال فراہم نہیں کیا گیا۔
متاثرہ شہری کا کہنا ہے کہ نہ صرف ان کا بلکہ سینکڑوں افراد کا یہی مسئلہ ہے، جہاں لائسنس کے اجرا کو کئی ماہ گزر چکے ہیں، جبکہ ڈیلیوری چارجز بھی وصول کیے جا چکے ہیں۔ ان کا کہنا تھا کہ ای-لائسنس کے باوجود اصل کارڈ نہ ہونے سے دورانِ سفر مشکلات کا سامنا کرنا پڑتا ہے۔
انہوں نے کہا کہ حکام کی جانب سے بارہا یقین دہانیاں کروائی گئیں، مگر عملی طور پر مسئلہ حل نہیں ہو سکا، جو متعلقہ نظام کی کارکردگی پر سوالیہ نشان ہے۔
چوہدری عابد محمود نے وزیراعلیٰ پنجاب مریم نواز شریف، آئی جی پنجاب پولیس اور ڈی آئی جی ٹریفک پولیس پنجاب سے مطالبہ کیا ہے کہ ڈرائیونگ لائسنس کی فوری فراہمی یقینی بنائی جائے تاکہ شہری قانونی پیچیدگیوں اور سفری مشکلات سے محفوظ رہ سکیں۔
