دینہ میں جی ٹی روڈ سے نامعلوم چور بینک ملازم کی 46 لاکھ روپے مالیت کی کار چوری کر کے لے گئے۔ پولیس نے مقدمہ درج کر لیا۔
تفصیلات کے مطابق جہلم کی تحصیل دینہ میں جی ٹی روڈ پر واقع پی ایس او پمپ کے قریب ایک افسوسناک واردات پیش آئی، جہاں نامعلوم چور ایک بینک ملازم کی 46 لاکھ روپے مالیت کی قیمتی کار چوری کر کے فرار ہو گئے۔
واقعہ نور محلہ دینہ کے رہائشی بینک ملازم عدیل اختر ولد محمد یونس کے ساتھ پیش آیا، جنہوں نے اپنی گاڑی (نمبر LED-18-286) شام کے وقت مذکورہ مقام پر پارک کر کے لاک کی اور گھر چلے گئے تھے۔
ذرائع کے مطابق جب عدیل اختر اگلی صبح تقریباً ساڑھے 9 بجے گاڑی لینے پہنچے تو گاڑی موقع سے غائب تھی۔ متاثرہ شخص نے گاڑی کو تلاش کرنے کی ہر ممکن کوشش کی لیکن گاڑی کا کوئی سراغ نہ مل سکا۔ گاڑی کی مالیت 46 لاکھ روپے بتائی گئی ہے۔
متاثرہ مالک کی درخواست پر پولیس سٹی چوکی دینہ نے نامعلوم چوروں کے خلاف مقدمہ درج کر لیا ہے اور چوروں کی تلاش کے لیے کارروائی کا آغاز کر دیا گیا ہے۔ پولیس کا کہنا ہے کہ جلد ملزمان کو گرفتار کر لیا جائے گا اور متاثرہ شخص کو انصاف فراہم کیا جائے گا۔
