پنڈ دادنخان کے نواحی گاؤں ڈھوک وینس کا واحد آمدورفت کا راستہ زیرِ تعمیر نہر اور برساتی نالے کی تعمیر کے باعث انتہائی خستہ حال اور خطرناک ہو گیا ہے، جس کے باعث اہلِ علاقہ کو روزمرہ آمدورفت میں شدید مشکلات کا سامنا کرنا پڑ رہا ہے۔
تفصیلات کے مطابق گزشتہ رات ہونے والی طوفانی بارش کے بعد کچا راستہ مکمل طور پر پانی کی زد میں آ گیا، جس سے پیدل چلنا اور گاڑیوں کی آمدورفت انتہائی دشوار ہو گئی ہے۔ مقامی افراد کا کہنا ہے کہ اگر بارشوں کا سلسلہ جاری رہا تو کسی بھی وقت گاؤں کا یہ واحد رابطہ راستہ مکمل طور پر بند ہو سکتا ہے، جس کے نتیجے میں ڈھوک وینس کا دیگر علاقوں سے زمینی رابطہ منقطع ہونے کا خدشہ پیدا ہو گیا ہے۔
اہلِ علاقہ کے مطابق انتظامیہ کی عدم توجہی کے باعث یہ مسئلہ دن بدن سنگین صورت اختیار کرتا جا رہا ہے۔ سب سے زیادہ مشکلات مریضوں، طلبہ، خواتین اور روزگار کے سلسلے میں روزانہ سفر کرنے والے افراد کو پیش آ رہی ہیں، جنہیں خطرناک راستے سے گزرنے پر مجبور ہونا پڑ رہا ہے۔
مقامی شہریوں نے بتایا کہ بارش کے بعد راستہ کیچڑ اور پانی سے بھر جانے کے باعث موٹر سائیکلوں اور دیگر چھوٹی گاڑیوں کا گزرنا بھی انتہائی مشکل ہو گیا ہے، جبکہ کسی بھی ہنگامی صورتحال میں ایمبولینس یا ریسکیو گاڑیوں کی بروقت رسائی بھی ممکن نہیں رہے گی۔
اہلِ علاقہ نے وزیراعلیٰ پنجاب محترمہ مریم نواز شریف، ڈپٹی کمشنر جہلم، محکمہ انہار اور دیگر متعلقہ اداروں سے پرزور مطالبہ کیا ہے کہ صورتحال کا فوری نوٹس لیا جائے، راستے کی ہنگامی بنیادوں پر بحالی اور محفوظ آمدورفت کو یقینی بنایا جائے، تاکہ کسی بھی ممکنہ حادثے یا ناخوشگوار واقعے سے قبل عوام کو ریلیف فراہم کیا جا سکے۔
