پنڈدادنخان کے نواحی علاقہ میں پولیو ٹیم پر آوارہ کتے کے حملے میں ایک ورکر شدید زخمی ہو گیا۔
تفصیلات کے مطابق جہلم کی تحصیل پنڈدادنخان کی یوسی کندوال کے گاؤں کنڈل میں دوران پولیو ڈیوٹی ایک افسوسناک واقعہ پیش آیا، جہاں آوارہ کتے نے پولیو ورکر پر حملہ کر دیا، جس کے نتیجے میں وہ شدید زخمی ہو گیا۔
زخمی پولیو ورکر کو فوری طور پر طبی امداد کے لیے رورل ہیلتھ سینٹر (آر ایچ سی) للِہ منتقل کر دیا گیا، جہاں اسے طبی امداد فراہم کی جا رہی ہے۔
واضح رہے کہ تحصیل پنڈدادنخان میں آوارہ کتوں کے حملوں میں اضافہ دیکھنے میں آیا ہے، جس کے باعث کئی افراد زخمی ہو چکے ہیں۔ چند روز قبل پنڈی سید پور کے نواح میں دو درجن سے زائد آوارہ کتوں کے حملے سے درجنوں مویشی زخمی اور ہلاک ہو گئے تھے۔
سماجی حلقوں نے متعلقہ حکام سے اپیل کی ہے کہ علاقے میں آوارہ کتوں کے بڑھتے ہوئے خطرے کے پیش نظر فوری اور مؤثر اقدامات کیے جائیں تاکہ انسانی جانوں اور املاک کو تحفظ فراہم کیا جا سکے۔
