جہلم: ڈپٹی کمشنر جہلم میثم عباس کی ہدایت پر ایڈیشنل ڈپٹی کمشنر جنرل صباء سحر کا جادہ میں تجاوزات کے خاتمے کے لیے آپریشن، پختہ تجاوزات کو ہٹاتے ہوئے متعدد تھڑے مسمار کر دیے گئے۔
تفصیلات کے مطابق ڈپٹی کمشنر جہلم میثم عباس کی ہدایت پر جہلم شہر میں ٹریفک کی بحالی اور روانی کے لیے جادہ کے مقام پر اولڈ جی ٹی روڈ پر تجاوزات کے خلاف آپریشن شروع کر دیا گیا ہے۔
پہلے روز جادہ میں اولڈ جی ٹی روڈ پر پختہ تھڑوں کو بھاری مشینری سے ہٹا کر راستے کھلے کر دئیے گئے آپریشن کی نگرانی ایڈیشنل ڈپٹی کمشنر صباء سحر نے کی۔
صباء سحر کا کہنا تھا کہ تجاوزات کی بڑھتی ہوئی تعداد اور شہریوں کو درپیش مشکلات حل کرنے کے لیے آپریشن شروع کیا گیا جس کے متعلق بہت دن سے اعلانات اور نوٹسز جاری کئے جارہے تھے، آپریشن بلا تفریق جاری رہے گا۔
