عمران خان کے لڑائی ہارنے کا مطلب پاکستانیوں کی شکست ہے، فواد چوہدری

سابق وفاقی وزیر فواد چوہدری نے کہا ہے کہ عمران خان کے لڑائی ہارنے کا مطلب پاکستانیوں کی شکست ہے۔

وہ 9 مئی کے گھیراؤ جلاؤ کے مقدمات میں فیصل آباد کی عدالت میں پیش ہوئے جہاں ان کی ضمانت قبل از گرفتاری میں 6 جون تک توسیع کر دی گئی اور انہیں دوبارہ پیشی کا حکم دیا۔

میڈٰیا سے غیررسمی گفتگو میں سابق وفاقی وزیر فواد چوہدری نے 9 مئی جوڑے مقدمات کو ’بے بنیاد اور من گھڑت‘ قراردیتے ہوئے کہا ہے کہ اگر حالات کو سنبھالنا ہے تو یہ جھوٹے کیسز ختم کرنا ہوں گے جبکہ بانی پی ٹی آئی عمران خان کے مقدمات کا اوپن ٹرائل ہونا چاہیے۔

انہوں نے کہا کہ عمران خان کے ساتھ کھڑے ہونا اس لیے ضروری ہے کہ اگر عمران خان یہ لڑائی ہار جاتے ہیں تو پھر پاکستانی یہ لڑائی ہار جاتے ہیں، یہ بات غیر متعلقہ ہے کہ کوئی تحریک انصاف میں ہے یا نہیں ہے۔

سابق وفاقی وزیر نے کہا کہ ہر شخص جسے پاکستان سے تھوڑی سی محبت ہے اور پاکستان کے عوام کی بالادستی چاہتا ہے، اس کو عمران خان کے ساتھ کھڑا ہونا پڑے گا، کیوں کہ اگر عمران خان یہ لڑائی ہارتے ہیں تو پاکستان بطور ملک اور ہم بطور معاشرہ یہ جنگ ہار جائیں گے۔

فواد چوہدری نے کہا ’ہم تو پھر کسی افریقا کا کوئی ملک بن جائیں گے، جہاں پر قانون کی کوئی بات ہی نہیں ہے، تو آپ نے عمران خان کا ساتھ عمران خان کی وجہ سے نہیں دینا بلکہ اپنی وجہ سے ان کا ساتھ دینا ہے۔‘

ان کا کہنا تھا کہ پاکستان کی عوام اس وقت عمران خان کے ساتھ کھڑی ہے، کوئی تحریک انصاف میں ہے یا نہیں مگر ہر وہ شخص جو جمہوریت، قانون اور آئین پر یقین رکھتا ہے اسے عمران خان کے ساتھ کھڑا ہونا ہے۔

انہوں نے کہا کہ خواتین کو ایک مقدمہ میں ضمانت ملتی ہے تو دوسرے مقدمے میں ان کو گرفتار کر لیا جاتا ہے۔ حکومت اور پی ٹی آئی کے درمیان مذکرات کے حوالے سے فواد چوہدری کا کہنا تھا کہ پہلے مذکرات کا ماحول تو بنائیں اس کے بعد ہی مذکرات ہوں گے۔

فواد چوہدری کا مزید کہنا تھا کہ موجودہ ملکی حالات کے باعث سرمایہ کار ملک چھوڑ کر باہر جا رہے ہیں، حکومت سرمایہ کاروں کو تحفط فراہم کرے.