جہلم: الخدمت فاؤنڈیشن جہلم کی جانب سے تعلیم کے فروغ کے لیے ایک اہم اور قابلِ تحسین اقدام اٹھایا گیا ہے، جس کے تحت نان فارمل (غیر رسمی) تعلیمی مراکز کے بچوں کے لیے 90 وائٹ بورڈز ضلعی انتظامیہ کے حوالے کر دیے گئے۔
تفصیلات کے مطابق ضلعی امیر جماعت اسلامی ڈاکٹر قاسم محمود چوہدری اور صدر الخدمت فاؤنڈیشن جہلم خبیب رضا بٹ کی قیادت میں وفد نے ڈپٹی کمشنر جہلم میر رضا اوزگن سے ملاقات کی۔ اس موقع پر الخدمت فاؤنڈیشن کی جانب سے لیٹریسی نان فارمل اسکولز کے لیے 90 وائٹ بورڈز پیش کیے گئے۔
ڈپٹی کمشنر جہلم میر رضا اوزگن نے یہ وائٹ بورڈز فوری طور پر ڈی او لیٹریسی میمونہ انجم کے حوالے کر دیے تاکہ انہیں ضلع بھر کے متعلقہ نان فارمل تعلیمی مراکز میں نصب کیا جا سکے اور بچوں کی تعلیمی سرگرمیوں کو مزید مؤثر بنایا جا سکے۔
اس موقع پر ڈپٹی کمشنر میر رضا اوزگن نے الخدمت فاؤنڈیشن کے فلاحی جذبے کو سراہتے ہوئے کہا کہ تعلیم کے فروغ کے لیے فلاحی اداروں کا حکومت کے شانہ بشانہ چلنا نہایت خوش آئند ہے اور اس طرح کے اقدامات تعلیمی پسماندگی کے خاتمے میں اہم کردار ادا کرتے ہیں۔
ڈاکٹر قاسم محمود چوہدری نے اس موقع پر کہا کہ الخدمت فاؤنڈیشن ضلع جہلم میں غریب اور مستحق بچوں کی تعلیم کے فروغ کے لیے اپنی کوششیں آئندہ بھی جاری رکھے گی اور نان فارمل تعلیمی مراکز کو درکار سہولیات کی فراہمی کے لیے ہر ممکن تعاون کیا جائے گا۔
تقریب کے اختتام پر ڈی او لیٹریسی میمونہ انجم نے ضلعی انتظامیہ اور الخدمت فاؤنڈیشن کا شکریہ ادا کرتے ہوئے یقین دلایا کہ فراہم کیا گیا سامان شفاف انداز میں ضرورت مند تعلیمی مراکز تک پہنچایا جائے گا تاکہ زیادہ سے زیادہ بچے اس سے مستفید ہو سکیں۔
